2016年2月29日 星期一

煎封黃花魚




老公同仔仔超鐘意食我的煎封黃花魚, 星期三老公襯我唔喺屋企自自己煎咗條同仔仔撐檯腳, 但係因為唔適技巧令條魚又唔脆又爛, 今日話要我教佢一次, 佢話一定要學識煎黃花魚技巧喎。

結果由我出口, 佢出手, 終於煎到條香脆黃花魚, 魚鰭同邊位卜卜脆, 魚肉嫩滑, 佢話條氣順哂喎。  不過我都幾肯定如果下次要佢再煎一次, 佢已經忘記哂D技巧喇。


技巧:

*黃花魚洗淨,抹乾, 用小許鹽抹勻在表面及肚內醃1小時。 黃花魚洗淨,抹乾, 用小許鹽抹勻在表面及肚內醃1小時。  煎之前要徹底將魚抹乾,否則煎炸時油會彈出。

1)用易潔鑊, 油要浸到半邊魚高度, 用半煎炸法。

2)先用慢火將魚的一變煎至剛熟, 之後轉大火將魚煎至香脆 (其間不用反魚), 轉大火後不時將鑊傾側, 令油流向魚頭及魚尾方向, 令整條魚炸得均勻。 一會後用鑊剷幫忙視擦魚的顏色, 如已夠焦香便可小心將魚反轉。

3)魚反轉後立即轉小火重覆步驟(2)

4)當魚的另一面焦香, 便可將魚最後反一次
(仍然用大火, 目的是令量邊同時金黃香脆, 完成便可上碟。

Tip:   要煎出金黃香脆的魚, 緊記要有耐性, 不要經常反魚, 我煎這魚時總共只反了三次。





2016年2月25日 星期四

炸滑豆腐




之前再外面食過滑滑炸豆腐, 好想試下整比愛食豆腐嘅老公試下。    因為豆腐本身水份多, 所以我用咗乾炸料, 因為出面食的炸豆腐很金黃, 我就加咗小小吉士粉去加色, 不過如果屋企無就可免。


材料:
盒裝煎炸豆腐一件
乾炸料 (所有材料預先攪勻):
生粉4湯匙
幼鹽1茶匙
胡椒適量
吉士粉1茶匙 (可免)


1)   豆腐脫盒後最好在室溫放1-2小時,待多餘水份流出









2)   將豆腐切成小件

3)  小心用廚紙吸乾水份







4)  將豆腐放入炸料中, 四面均勻沾上炸料。

5)  中火燒滾油, 小心投入豆腐, 炸至微黃, 上碟前開大火迫出多餘油份及至豆腐乾身便可。

6)  小心撈起放廚紙上略吸油份便可上碟。





貼士:
1)豆腐本身會出水, 豆腐脫盒後最好在室溫放1-2小時,待多餘水份流出
2)可能火力同酒樓有別此,菜必要立即進食 ,否則放耐咗就會開始潮濕, 會失去香脆口感。

2016年2月24日 星期三

好友聚




有D朋友,相識可耐都唔會深交, 但另外一種, 唔需要相交好耐反而可以無所不談, Nancy兩夫妻就係後者。


新年之前Nancy送左d寧波年糕俾我, 之後去旅行又專登買咗D綠茶粉比我。   為咗答謝佢, 琴晚在家招呼佢两夫婦嚟自食其糕, 同嘆綠茶。

呢餐五人五餸一甜品,仲有Nancy的两板拿大海膽,大開心,大滿足的一餐。

菜式:
娃娃菜肉絲炒年糕
上素冬瓜環
炸蝦丸
籠仔滑雞糯米飯
鹹魚煎肉餅

甜品:
迷你香蕉朱古力慕絲










2016年2月19日 星期五

芒果糯米糍 (食譜)





無錯喇,又係佢地呀。 又係芒果同糯米o既另一組合,今次係好愛o既芒果糯米糍,比前日整o既芒果糯米飯更好味呀。  舊年經常整,今年係第一次呀,好yum yum 呀。  今次同老公分工,佢幫我切芒果粒同滾椰絲,手勢唔錯,下次再徵用佢先。

做法一d都唔難,你地都可以試下呀,都可以請小朋友同老公幫手,當親子活動呀。


材料 (可做約20粒):

熟透芒果肉(兩個切方粒)

糯米粉160g  +  吉士粉20g

椰汁400ml (唔夠可用200g椰汁加200g水代替)   

糖70g  

油1湯匙

椰絲適量

做法:

1) 椰汁半份(200ml)加糖煮熱(細火),至糖溶透便可

2) 把
(1) 加入另外半份椰汁內令其降溫,攤至室溫備用

3) 一面逐少把(2)加入糯米粉和吉士粉內一面攪拌, 
攪至確保無粉粒,最後再加油拌勻成粉漿

4) 把(3)到在深碟上,用保線膜蓋好,蒸約10分鐘或至粉團熟透


5) 粉團攤至微暖,用膠刀移到掃上薄油的檯上切成小份

(要用膠手套)


6) 包入芒果粒,滾椰絲便成。











2016年2月18日 星期四

娃娃菜肉絲炒年糕



好友送咗3包寧波年糕比我, 我之前未整過, 今次就試下切薄片, 用中式汁料再加D豆辦醬炒, 配埋娃娃菜同肉絲, 出嚟效果好惹味,好有上海菜嘅感覺。 
因為第一次做,只用咗一包年糕, 下次可以放膽炒多啲喇。 



食譜:  


材料:  (6人份量)

包裝年糕300g(切片)
娃娃菜600g
蒜片4粒
肉絲180g
花雕1湯匙
 水100ml

肉絲醃料:
生抽1湯匙
糖3/4湯匙
老抽1/2茶匙
生粉1茶匙
油1茶匙


調味汁料 (預先調勻備用):
老抽1湯匙
生抽1.5湯匙
糖2茶匙
豆瓣醬2茶匙


易潔鑊下2湯匙油燒熱,下肉絲用中火兜炒至半熟, 下蒜粒炒至肉絲熟透,贊酒炒兜炒,













下菜及年糕片,















加水及調味汁料兜炒,













蓋上煱轉慢火炆煮至菜淋熟,試味便完成。

2016年2月12日 星期五

美極煎豬頸肉




屋企附近有間茶餐廳, 老公去親都會叫豬頸肉菜飯, 話啲豬頸肉鹹香惹味。  一碟得薄薄5,6片, 老公次次唔夠喉, 一於又嚟個自家版, 等佢食個夠。

餐廳係用豉油, 我今次就用咗較惹味嘅美極同老抽做醃料, 又係大成功阿。


材料:

急凍豬頸肉 2大件 (約520g)
美極2 3/4湯匙
老抽3/4湯匙

**醃料份量請按肉重量比例調節



1) 豬頸肉解凍洗淨, 抹乾, 片去多餘油份(太厚的話要片薄一
點),  用叉在肉上均勻刺上密集的小孔, 越多越有助入味。








2) 下醃料醃放雪櫃醃過夜

3) 取出豬頸肉, 倒去醃汁於室溫置1小時, 切成小件

(豬頸肉較難入味, 最少要醃一夜)






4) 易潔鑊燒熱油, 慢火煎至熟透及微焦, 切薄片便可食用。









**要選較薄的豬頸肉, 如太厚可再煎的途中蓋上鑊蓋稍焗一會, 之後開蓋煎。








2016年2月9日 星期二

大年初一之良朋歡聚九人晚飯

大年初一之良朋歡聚九人晚飯 - 亮點係學酒樓做嘅荷葉蒸雞糯米飯, 滑雞加臘腸同香軟又粒粒分明嘅糯米飯,朋友們都大讚好味, 一斤糯米好快就清哂, 大成功呀! 

(因過年很忙,食譜遲D同大家分享)





2016年2月7日 星期日

送羊迎猴團年飯

團年飯順利完成,仲做左西米布甸做甜添,一家人過了温馨又開心嘅晚上。

順道同大家拜個早年,祝各位猴年事事順心,健健康康,開開心心,幸福滿满!


2016年2月4日 星期四

沙薑雞腳(簡易版)



離新年仲有幾日, 預祝大家好似呢味餸咁, 淨係攤大手板都財源滾滾來。
呢味其實係下價菜式, 但再外面食幾十蚊先得幾隻, 上星期六用50蚊買料整左兩磅, 帶去伯父家團年, 十幾人都夠食呀。

我用咗我最愛嘅四季雞粉做, 超級簡單, 無需另加調味就做到美味雞腳, 成家吮得好開心, 兩磅半雞腳好快就成煲清晒喇。用呢個方法無炆爛但就超淋軟又, 連九十幾歲幾伯父都連食三隻呀。。



材料:

四季鹽焗雞粉2包
水1000ml
急凍雞腳2.5磅
麻油小許


雞腳解凍, 去甲洗淨









出水10分鐘









撈起沖去污物, 再浸凍水至完全冷腳









燒滾1000ML水, 下四季雞粉, 轉慢火煮5分鐘至出味, 用隔油網撈起湯渣








下雞腳, 中火煮滾, 轉慢火炆1小時或至雞腳淋軟位止, 上諜, 可按喜好灑上小許麻油便完成。


**我用LC鍋, 如用其他煲具, 請自行按經驗調較水份及炆煮時間。