2016年3月31日星期四

弘Chirashi - 魚生二段丼

上星期睇電視見 Do Do介绍築地魚生丼 (二段丼)流哂口水,我記得香港有得食, 就立即上網搵到呢間 "弘Chirashi"(灣仔)魚生飯價錢合理, 反而蟹飯就貴咗D。  食物 質素都唔差, 可以再去。



魚生二段丼 $158 - Good!

下層魚生飯, 仲有兩片加拿大海膽

松葉蟹二段丼 - $288 -  蟹肉不算太甜, 一般


如果D飯暖D會好D, 因拆蟹身肉撈飯, 上檯D飯係凍嘅, 所以我覺得徙咗。 


殼用蛋加豆腐蒸, 本應不錯, 但可能又要等拆蟹身肉撈飯時間, 所以又係凍嘅, 殺風景!


鹽燒青魚 $68 單點價,  - 賣相同味道都很好!








2016年3月19日星期六

花雕糊椒炆豬手



因為要清理冰箱迎接新嘅凍肉,加上有朋友到訪, 惗住整醉豬手。    但老公話凍冰冰最好熱食,  見屋企有八角同白胡椒粒, 就試下改一改,用現有嘅材料試下炆豬手,材料簡單但好味, 朋友們都話好鍾意啊。   
靈活處理食材同埋調味料嘅配搭,做出新口味菜式 烹飪有趣之處


材料(8-10人份量)


急凍豬手16件
八角5粒
白胡椒1湯匙或按喜好(用小布袋包著)
薑片數片
冰糖2小粒
花雕3/4碗
雞湯

步驟: 
-豬手出水15分鐘






-洗淨備用








-加入花雕酒,白胡椒粒,八角和薑片煮至大滾
-加入豬手, 再度滾起後蓋上鍋蓋,慢火煮約1小時
(我用LC煲,水份幾乎蓋過豬手便可)



 
***白胡椒用小布袋包著

2016年3月16日星期三

肉眼扒晚餐






今日老公返工, 得我同Owen, 放工後又有kill time任務: 

1)Owen要求嘅前肉眼晚餐 (仲加多咗個罐頭忌廉磨菇湯)
2)老公指定嘅菜脯肉鬆煎蛋(聽日帶返工嘅飯盒)

老公買,我煮,Owen洗碗,各施其職,煮同食嘅都開心。

***************************

煎牛扒方法: 

中火燒熱4湯匙油先煎封扒的邊位之後平放牛扒每約30秒反一次共反4-5煎至67成熟煎的時間牛扒厚度及個人喜歡的熟度調)。


牛扒離鑊放在砧板上靜5分鐘即成。

**************************

梁九肉眼真係平, 靚正, 成塊面咁大, 食到夠哂喉呀。 



2016年3月15日星期二

豆卜粉絲珍寶蜆



上星期見到有珍寶蜆賣, 老闆仲話包無沙添, 十幾隻都係賣$60, 就買多幾粒豆卜, 加埋粉絲, 超簡單美味 。  蜆肉大大粒, 真係完全無沙, 好鮮味呀。 

材料: 

珍寶蜆十多隻
豆卜(切半)
粉絲2札(浸軟)
雞湯適量
胡椒粉大量(可隨意)
蔥粒適量

1)珍寶蜆徹底洗淨, 瀝去水份備用
2)煮熱適量雞湯, 先將豆卜煮軟,隨意下些胡椒粉
3)下珍寶蜆和粉絲煮至蜆剛開口, 最後灑上蔥粒便可食用。 




2016年3月11日星期五

鰹魚汁溫泉蛋


上星期忽然話想食溫泉蛋, 我就試下用電蒸爐做一次俾佢食, 做法非常簡單

1) 直接將從雪櫃取出嘅雞蛋放入凍水, 水要浸過雞蛋
2)放入電蒸爐, 70度煮29分鐘,
3)取出雞蛋略沖凍水

話咁易就做出靚靚溫泉蛋配日本鰹魚汁,係一個一百分嘅頭盤小食

**如果冇電蒸爐嘅話,用明火也可以, 做法,溫度,和時間都一樣(但系要不時留意水温,當溫度下降嘅時候就要開火,令溫度番去70度)

日式咖哩蛋包飯(蛋包飯製作圖解)



前幾日Owen仔放假接我放工一齊去買餸, 佢忽然間話想食咖喱蛋包飯,我話時間緊迫, 想食就一齊幫手整。  佢話ok我地就一齊買餸,一齊整蛋包飯餐,仲一齊洗碗, 兩母子難得的合拍呀。  呢一餐雖然唔係乜野貴重大餐, 但係真係回味無窮。

呢個係較傳統嘅蛋包飯, 要嚟配咖哩 或茄汁都一樣好味。   其實唔難整, 大家參考吓下面圖解就知點做㗎喇。




在20cm底徑易潔鑊上掃薄油, 下蛋汁(不用太厚), 約1隻半蛋,輕搖鑊身令蛋汁均勻覆蓋鑊底

開慢火將蛋皮煎至8成熟 , , 關火(其間可移動鑊令蛋皮均勻受熱)






將一碗飯倒扣在蛋皮中央, 用鑊剷將上方的蛋皮覆蓋飯團,


小心將飯團和蛋皮傾倒到碟上,










用廚紙覆蓋蛋皮和飯團, 將蛋皮邊收在飯團底, 再用手將蛋皮兩邊收緊捏成橢圓形 最後加配料和汁料, 便成為美味蛋包飯。


**隻手係Owen仔的, 佢都整到, 你地都可以。

2016年3月7日星期一

香煎梅頭豬扒




梅頭豬扒無骨, 香滑又充滿油香, 只要用刀背略琢數下便可, 只醃咗2個鐘頭就超入味。
我用咗嚟配菜, 加埋糖心蛋, 簡單但美味的一餐。

急凍梅頭豬扒 6 件 (
老抽1/2湯匙
生抽3湯匙
砂糖1 1/2 湯匙
玫瑰露1湯匙
生粉3/4湯匙
油1湯匙 (後下)

1)梅頭豬扒解凍, 洗淨抹乾, 用刀背琢數下, 用較剪把邊位的脂肪剪斷 (否則煎時會卷起)











2)切成小件, 用醃料撈穫勻, 之後再下油撈勻醃2小時













3)易潔鑊下2湯匙油將豬扒煎熟及兩面微焦便可。

**6件扒要分兩次煎, 煎完第一批要清洗鑊再煎餘下的。

玫瑰鍋料理慶功




為慶祝玫瑰鍋料理加印第二版, 琴晚宴請之前幫我出書的出版社朋友,當日佢地嚟一味掛住影靚相,都無真正食過D菜式, 今次專登請佢地嚟坐定定食返餐慶功飯呀。

三位賓客加我家三口共6人, 準備咗8餸,1甜品.  除左剩翻少量咖喱, 其餘全部清曬, 都好厲害呀!
因為三位賓客當中有不食牛和蝦,蟹敏感, 就為佢地設計咗下面菜單。 佢地都好滿意, 飽到捧住個肚走阿。

菜單:
海膽三文魚子豆腐
素鵝
糯米釀雞翼
古法蒸紅魚
西蘭花鮮魷
青咖哩雞
青檸豬肉生菜包
娃娃菜肉絲炒年糕
甜品:  法式焦糖燉蛋












2016年3月1日星期二

茄汁蝦碌


我呢個簡單版本只用茄汁同砂糖調味,可輕鬆地一鑊過炒出味味蝦碌, 蝦殼沾滿茄汁加埋爽甜蝦肉, 好味到連手指都吮埋呀。 


食譜:

大蝦 1.5

蒜頭 3粒(切粗粒)

茄汁 1/3

砂糖 約1.5湯匙 (或適量)

花雕酒 1湯匙


-大蝦1.5斤去頭部尖角部份及蝦腳,挑去蝦腸,洗淨,抹乾,下少許生粉拌勻令蝦沾上一層薄粉


-5湯匙油用中火燒滾,爆蝦至8成熟,關火









-投入廚紙,用鑊剷幫助將多餘的油索去, 剩下約1湯匙油在鑊中便可。











-開中火下蒜粒爆香, 贊酒兜炒至蝦熟透














-最後下適量茄汁 1.5斤蝦約1/3枝)和適量砂糖調至合自己的酸甜度,













-炒至乾身便可上碟啦。


*我只用茄汁加糖調味,很簡單。

*茄汁要沾滿每隻蝦為標準,最後才下糖調味。

*不要太早下鑊,否則會燒焦。