2015年3月31日星期二

香煎鱸魚柳配忌廉磨菇飯







又係速食晚餐, 老公去買餸,洗乾淨等我放工返去煮, 半個鐘多D就食得啦。 合作愉快!

三人份量

小鱸魚3條, 請魚檔代起肉
鹽/胡椒各小許

白汁磨菇湯一罐
奶/ 水220ML

白飯3大碗

做法:
鱸魚片洗淨抹乾,臨煎先灑小許海鹽同胡椒,用中火煎香兩面,

煎的期間用鑊剷按壓魚片,否則魚肉會彎曲, 影響賣相
(切記唔好心急,唔好經常翻動魚片,同翻的時候要小心,否則好易爛。)

磨菇湯一罐, 脫脂220ML 邊煮邊攪煮成汁, 隨意加小許鹽和黑椒調味。

飯上碟, 放上魚塊, 最後淋上汁料,  Serve!!


2015年3月24日星期二

雜菜盲鰽魚奶鍋

盲鰽魚很滑,魚奶湯充滿魚味同豆腐嘅香味,超正呀,加埋烏冬,一鍋食到飽,簡單又有營。
材料:
盲鰽魚一條(約一斤) 
百福豆腐一件  (切件)
本菇一包  (去腳用水略冲備用)
牛奶500ml 
雞湯1500ml 
大白菜半個  (切片)
薑數片  
鹽適量
胡椒粉適量 
烏冬隨意
*湯和奶的分量視乎鍋的大小調節


做法:
-盲鰽魚洗淨,蒸十分鐘至8成熟
-用一個電火鍋加入湯和薑片煮至滾起
-加入大白菜及本菇煮五分鐘,將魚放進湯內,放入豆腐煮五分鐘
-最後倒入牛奶,灑上胡椒粉,鹽調味,煮至滾起便可進食

2015年3月19日星期四

香煎牛仔骨配茄汁天使麵

公司由太古搬左去觀塘,用成本效益,老公吾會來接我放工,返到屋企街市時差唔多收曬啦。如果想煮飯,就要早一日買/準備好食材。

琴晚將d牛仔骨解凍再醃好,今晚煎好配茄汁天使麵,吾駛半個鐘就有美味嘅晚餐食。

材料:

牛仔骨3件
現成意粉汁一包(見下圖)
天使麵1/3包

牛仔骨醃料:
生抽3湯匙,砂糖2湯匙,玫瑰露1茶匙, 黑椒適量

**呢個醃汁要偏甜一點,煎完先會帶甜味 

**因各牌子生抽味道有別,提議先調好汁,試味先落肉  

做法:

-牛仔骨解凍,索乾水份,用肉鎚打數下,加醃料醃最少2小時。

-天使麵放熱水中煮至八成熟

-把醬汁到進易潔鑊, 慢火煮熱,撈起天使面直接投進醬汁之中,撈勻便可上碟,本想切開了的牛仔骨,美味晚餐就完成!

2015年3月18日星期三

生日家宴

上星期日一次過慶祝四位家人生日,仲加埋宴請鴨脷洲邨的舊鄰居共18人,今朝8點幾起身買料同製作生日蛋糕+甜品(木糠布丁),仲有主菜炆豬手,其他簡單的就晏D先整。

因人太多,不能太多款式,多數菜式都係打孖上,18煲/碟加2甜品清左9成幾,食剩的都被賓客外帶回家,都算好利害呀!


在此福兩位姨姨,姐夫和嫂嫂生日快樂,日日健康,幸福!

雜豆煙肉蛋炒飯


琴日請客阿但系餸菜太多,煮咗成煲飯無人食,唔想浪費今晚就整個炒飯做晚餐。加上所有材料都系冰箱電已經有嘅,所以喱餐基本上系免費嘅!

煙肉四條  雞蛋3隻打散  冷飯5碗  雜豆一碗   糖1.5茶匙,鹽1茶匙 

1)用一大易潔鑊,下煙肉粒爆香,然後將冷飯放進鑊中

2) 下雜豆,將全部材料兜勻(雜豆先用水煮一分鐘,然後瀝乾備用)

3) 再鑊中央開一小洞,加少許油,將蛋汁放進,但開始夾結皮時,將飯快速兜炒

4) 最後下糖,鹽調味便完成。

tips: 煙肉本身有鹹味,鹽的份量不要下太多。

2015年3月10日星期二

士多卑梨紐約芝士蛋糕 (付食譜)



藍莓口味已經做了很多次,今次聽到街市有個好靚嘅士多啤梨賣,就試下整個清淡d嘅酸忌廉加士多啤梨口味,口感清新唔錯呀!

喱個蛋糕最好兩日前做定,因為喱個蛋糕說起碼兩晚效果最好架

食譜:      7 (圓型甩底模, 用雙重錫紙封底以免滲水 )

材料  
餅底:  
消化餅   8pcs      牛油 70g 

芝士糊:
忌廉芝士  500g              140g          酸忌廉     120g           
全蛋 1        蛋黃1個

裝飾:
酸忌廉+糖霜(份量按個人喜好)
士多啤梨適量

做法:
1)      於模邊掃牛油和灑麵粉,消化餅壓碎,拌入已溶牛油,壓平舖在模底 , 用錫紙包好底部,以免入水,放雪櫃半小時.
2)    焗顱預熱180
3)   忌廉芝士於室溫放軟,加糖打至滑身,再加入雞蛋拌勻,不要攪拌太久, 混合便可
4)   加入酸忌廉拌勻便可倒入模中。
5)   用坐水法,水要起碼吋深,焗約35 - 40分鍾至表面乾燥(要不時查看,以防過火)
6)   倒去水份,再焗約10分鐘至表面微黃便完成 
7)   出爐,攤涼最少過夜(雪兩夜更理想),脫模,再按起好放上酸忌廉和鮮果裝飾便完成  
     (除裝飾,亦同時瘇中和肥膩口感)
**鮮果上掃上小許果膠, 就會立立令, 靚好多㗎. 

2015年3月8日星期日

超簡單二人鰻魚定食

放工返到屋企已經7點,街市已收左,得我同仔仔两人,用屋企儲定嘅食材,做左鰻魚定食同仔仔共享。梁九記鰻魚加寒天沙律,茶碗蒸蛋同麵豉湯,二人前只需40幾蚊成本,仲半個鐘就攪掂。仔仔仲話如果日日有得食就好了。

遲D公司由太古城搬去觀塘,以前老公車我放工十分鐘就到屋企,搬左之後凈係隧道費都折$50,加上來回車程遠吾會過嚟車我,返到屋企會夜好多,以後會煮小D,就算煮晚飯都會係前一晚買定準備好第二日煮,多數會係簡單定食或大碗飯了。要諗多D花款,等老公同仔仔冇咁悶先。

2015年3月7日星期六

西蘭花魚塊

呢個係年初一 奉客的菜式之一, 無新鮮魚買既日子, 做呢個都唔錯架。

急凍龍利两條   
鹽小許   
蛋白1/2隻  
生粉兩大湯匙 
西蘭花兩大個 

雞湯200毫升  
鹽少許 
生粉水適量 
蒜片十數片

-徹底解凍,吸乾所有水份,用小許鹽灑在兩面醃30分鐘

-西蘭花洗淨,切件,用水煮一分鐘,撈起放碟上

-將魚肉切成小塊 

-將半隻疍白加入魚塊
撈勻,下生粉撈勻

-下易潔鑊半煎炸至熟

-將廚纸放入鑊內,吸去鑊內多餘油份,餘下小許便可(魚不用起鑊),下蒜片爆香

-下湯汁,煮滾後下生粉水埋茨成薄芡便可上碟。

2015年3月1日星期日

簡易葡國雞

 







年初四做了25人份量奉客,結果全部清曬,連汁都無剩。喱一個送要嚟送飯,意粉,薄餅或者多士,一樣美味,而且做法簡單,你地都試下。

食譜:  

急凍雞扒三件
大洋蔥一個
甘筍一條
薯仔兩個
葡國雞汁一樽
水適量
糖少許


-雞扒解凍,抹乾,切成小塊用一茶匙幼鹽撈勻萬醃15分鐘
-薯仔整個洗淨用清水煮12分鐘至熟(時間按薯仔大小自行調節),趁熱撕去薯皮,切件備用
-洋蔥切片備用
-易潔鑊燒熱一湯匙油,下洋蔥爆炒一會,下雞肉炒至半熟
-下匍汁(先下3/4樽)及水(水的分量差不多蓋過材料便可)
-下甘筍蓋上鍋蓋蚊煮10分鐘
-下薯仔炆10分鍾試味,如需要可加少許糖調味,完成便可上桌。
-記住水不要下太多,否則味道會不夠濃。
-因每個人用的鑊大少有分別,水分可能會有些出入,建議先下3/4樽匍汁,留下一些最後試味時再加進,這樣較容易控制味道。