暖笠笠 - 薑蔥魚腩煲

星期五同同事去左茶餐廳食大圍飯，o個日好凍，我地叫左幾個熱辣辣o既煲仔菜，其中一個係薑蔥魚腩煲，好惹味，一路食就諗老公同阿B一定鐘意食呢個菜，搵日都要試o下整。  星期日有機會煮飯，就立即諗起呢個菜，雖然公夫多少少，不過真係好好味，又暖笠笠，值回票價。

*另一食法，就係炸完立即食，唔駛落煲，老公話其實就咁炸都好好味，好香脆(因為我炸完佢就入黎偷食)。我地都掙扎過究竟落唔落煲，不過老公話既然切晒材料，就唔好浪費，下次天氣無咁凍就會就咁食喇。

做法：

鯇魚腩一大個，切粗條 (1吋多d ，7-8條)　/  薑片  / 蔥大量 切段

醃料：　薑汁酒(薑磨蓉加入花雕酒) ，生抽，糖，老抽(小許，只為加色)

芡汁：     蠔油，生抽，糖，水碗，麻油    + 生粉水(埋薄芡用)

-洗淨，抹乾，用薑汁酒(薑磨蓉加入花雕酒)，生抽，糖，老抽(小許，只為加色)醃至少兩小時

-醃好後，倒去多餘的醃料，加入兩湯匙生粉拌勻

-用易潔小煲炸熟魚腩，撈起，索去多餘油份備用

以下兩點要同步進行：

-準備煲仔 –  煲仔加油及數片薑片開小火，慢慢加熱，爆香生薑 (媽媽教煲仔開初最好用小火)

-另一面爐頭用鑊下油，猛火爆香生薑， 下蔥段，再倒下汁料，煮滾， 最後下生粉水埋薄芡，立即下魚條快手兜數下 (目的只是要魚條沾到芡汁)。

-此時煲仔已大熱，薑也爆香，快手把鑊中所有材料倒進煲仔， 食得喇!!

*如時間配合唔到，中途可熄火，不過要確保材料過煲時煲仔一定要夠熱，唔係就唔會有”咋，咋” 聲，就唔係o個件事啦。

*呢個時候會 “咋，咋”聲，仲有一陣白煙，好有feel 架。