蟹肉蛋白扒豆苗（附食譜）

臨過年前，叫老公幫我喺樓上凍肉店買左兩磅蟹肉準備過年用，我都未試過，不過見個list有，仲24蚊一磅咁平，一試無防呀！。年初五嗰日Owen負責蝦仁炒蛋，我就整咗蟹肉豆苗同埋懶人雞翼，兩母子拍住上整咗呢餐美味晚餐。

急凍蟹肉只係24蚊一磅，有半舊磚頭咁大，要隔夜放在雪櫃普通格溶雪，用溶雪後都幾腥㗎，不過唔使擔心，處理咗就冇問題啦。  

老公食過，讚味餸味道同賣相都有酒樓水準添，氹到我鬼咁開心。

食譜：

豆苗一斤四両

急凍蟹肉一磅裝一件（溶雪後得返大半磅左右）

上湯450毫升

蛋白2隻

鹽，胡椒粉少許

1）急凍蟹肉隔夜放雪櫃普通格溶雪備用 

2）徹底楂乾水份，用兩湯匙油炒香備用

3）豆苗炒熟，放在筲箕上，稍為瀝乾水份

4）用鑊煮滾上湯，加入蟹肉，加小許鹽和胡椒粉調味，再滾起時，用生粉水埋薄芡，熄火，倒入蛋白輕力推成蛋花，最後將芡汁淋在豆苗上便可。