2013年11月22日 星期五

21週年之旅











下星期就係結婚21週年,我同老公今年會去馬來西亞 亞庇(Kota Kinabalu) 玩幾日,今次有兩晚會住o係 Gayana Eco 水上屋,希望天公造美啦 (因為d bloggers話如果天氣唔好d水唔清呀)。


返黎同大家分享旅遊點滴呀。



2013年11月20日 星期三

New York Cheese cake




 
 今日係舊鄰居兄妹的生日,前日Owen親自去買定料,叫我整左呢個New York Cheese cake 送去比佢地食,難得佢咁有心,我都吾介意接呢單蝕本生意呀.   
 
祝善同&諾文兩兄妹做的生日蛋糕,預祝二人明日生日快樂,日日開心 ^^
 
呢個蛋糕人見人愛,亦係最易整o既,最好雪兩日先食,咁就一定夠硬同夠凍喇。
 


 
 

2013年11月18日 星期一

蝦米上湯浸豆苗

 
 

天氣開始凍,豆苗又當造喇。 琴日經過街市,見賣$24蚊斤,就賣左斤黎食,但當然唔係杯苗,不過我愛有莖的多d,因為平d,高纖d又有咬口d, 個湯加左蝦乾仲好香添架。

用上湯浸,加埋o係曼谷買返黎o既蝦乾,香口又惹味呀。

做法好簡單:

豆苗1斤,雞湯2杯,花雕1湯匙,蒜頭去衣5粒,蝦乾隨意

1)蝦乾先用1/3碗水浸泡10分鐘,撈起,水留用
2)下3湯匙油,慢火煎炸蒜頭至微焦,下蝦乾爆一會
3)下雞湯+蝦乾水煮至大滾,下花雕,再下豆苗煮至熟便可上碟。


2013年11月16日 星期六

圃國雞






簡易圃國雞,呢個菜請客同開party最啱,配飯,意粉,法包同印度Roti都一流,仲好容易整又好味道添呀! 

材料8-10人份:

雞扒三大件去皮切塊,用小許盬醃一小時備用
一個洋蔥 (大)切片/ 甘筍兩條 - 切角 / 薯仔一大個切件  /李x記葡汁一樽 / 水適量 /淡奶或椰槳100ml

1) 薯件下鑊用小件油爆香表面,加水煮至半熟撈起備用
2) 爆香洋蔥片,下雞翼爆一會
3) 下葡汁 +水 + 薯仔這紅甘筍(水剛蓋過全部材料便可)
4) 兜勻,轉小火炆10分鐘左右,至甘筍熟透,加奶或椰汁,減輕醬料鹹味,最後試味便完成(有需要可下小許生粉水埋薄芡。

**炆的期間要留意水分多少,稀濃到要適中。
**薯仔分開處理,係因為如果吾煮至半熟,起碼要煮20分鐘,而甘筍同雞塊好快淋,煮得耐吾好味,但如果用雞翼或脾(連骨)做,就可以一齊炇。

2013年11月15日 星期五

泰好味 - 咖哩魷魚




上次去完蘇梅,o係食店見到廚師整咖哩炒蟹肉,不過急凍蟹肉好難買到,所以我決定用返我自己o既方法,整返我自己版本o既咖哩鮮魷喇, 因為呢個汁,老公食左三大碗飯呀。

食譜:
-魷魚洗淨切花,再切件, 出水,不要過久,剛熟便可,撈起,過冷水, 瀝乾備用
-先爆香洋蔥,再下青椒爆一會,下半包 咖哩粉爆香 (鑊不可太乾,否則會焦,如需要可加小許油),爆至聞到咖哩香味,再下半碗雞湯
-魷魚回鑊唐芹炒一會
 -下調味( 魚露 2湯匙/ 1湯匙 //半罐花奶) 煮至滾起
-轉最小火,最後下2隻漿兜至起蛋花,試味及用魚露和糖最後調味。

**我個人覺得,呢個菜都係要帶小小甜味先有泰菜風味,不過最緊要係o岩你自己,所以試味係好重要架。
**魷魚回鑊後不能炒太耐,過熟唔好食架。






2013年11月12日 星期二

曰式茶碗蒸蛋





Owenmama整親腰骨,瞓左幾日床今日先好番D,一家三口吾駛再捱外賣。冰箱有日式鹽漬魚(在Apita日本節promo買100蚊兩條)只要解凍,掃油再用焗爐焗熟就得,老公一手攪得掂。

我只係企左五分鈡做左幾個茶碗蒸蛋,一家三口簡單食個燒魚定食,好過再食超油同味精外賣。

要做茶碗蒸吾難,做法如下:

-蛋同雞湯比例為 1 : 2 (即150ml蛋加300ml 雞湯)雞湯份量內包括1湯匙鰹魚汁
-先打散蛋,再下雞湯攪勻,過篩再倒入茶碗
-慢火蒸8分鐘(火太猛蛋會孩口) 

**如做普通蒸水蛋側不用下鰹魚汁
**蒸的時間按容器大少及爐具火力自行調節

鰹魚汁, 呢個汁好好用,加冰可以送冷素麵/烏冬,加水煮熱就成為日式湯烏冬,一汁多用架。



魚解凍,掃油,放入焗爐220度焗約十分鐘至金黃便可





2013年11月11日 星期一

超鬆軟棉花蛋糕




上星期老父生日,我做左個栗子蛋糕比佢,今次用左鬆軟嘅日本棉花蛋糕做底,結果比用一般海棉蛋糕好得多。

呢個食譜轉載自"烘出蛋糕香",吾難做,但好軟,香,滑㗎! 




食譜: 本來係13.5" x 9.5"盤, 我今次用了7吋方模

牛油 60g / 低粉 80g / 牛奶 80ml / 蛋 6隻 / 砂糖 90g / 鹽 小許



 做法:

- 預熱焗爐160度

- 牛油置煲申慢火煮容,關火,加入低粉拌勻,加奶,1隻全蛋和5隻蛋黃慢慢攪到滑身,右粒粒
 

- 5隻蛋白打至起泡,下鹽,及分三次下砂糖,再打到呈現尖角狀


- 蛋黃漿分兩次拌入蛋白霜(fold in) 至混合至均勻,然後倒入舖牛油紙的盤中,雙手提高盤在桌上輕敲一下使空氣排出
 
 
- 置於焗爐中層焗15分鐘(160度),之後轉140度焗五分鐘,用竹簽測試熟度,如刺過拔出沒有黏著蛋糕漿便可出爐
 

- 出爐後馬上在鐵架上倒扣待涼,便可撕去底紙,切成方塊,搽上奶油忌廉㚒心便完成

**我用了7吋方模,蛋糕較厚,焗的時間差不多用多了十分鈡,記住用竹簽測試,熟透才可出爐呀

2013年11月7日 星期四

自家製栗子蛋糕 + 焦糖燉蛋






上星期六係爸親大人生日,為佢做左佢最鐘意嘅栗子蛋糕,用左棉花蛋糕做底,好香軟呀!
爸爸同家人都超鐘意呀!一行12人食完海鮮再返我屋企食蛋糕  + 睇巨輪結局,好開心呀!

今次用左罐裝無糖栗子439g一罐,加左80g糖霜打勻,再加100g淡忌廉打勻,放入雪櫃雪一個小時就可以放入唧袋。



棉花蛋糕片,好軟,好棉,做cream cake 底一流呀! 


同場仲整左十幾個焦糖燉蛋,雖然大家都好飽,但係一樣清哂呀!






2013年11月6日 星期三

大製作

 
 
 
 
 
 
 
 
 
 
 
 
 
 
 
 
 
琴晚忙左一晚,今朝一早起身切餅同裝飾,100+件小甜品order順利完成!yay!
 
感謝老公不停幫手洗用具同去買補給物資,呢個任務先可以順利完成呀。 
 
 



次係受託於朋友的榮休餅,亦係第一次收錢的order,所以我對產品要求提高,有小小壓力架。
訂單:
 
訂單:
Chocolate Brownies x 34
New York Cheese cake x 24
木糠布丁 x 25
雙層朱古力忌廉杯 x 21

雖然忙左成晚,但係真係好開心,同埋越做越起勁,總之我o係廚房就會充滿力量呀。





2013年11月5日 星期二

日式薯仔沙律





平時日式西餐廳食晏,有時都會食到,但係通常都係得一個細細的雪糕球份量,真係到喉唔到肺。 平時oJusco / Apita 買,二十幾蚊得d d咁多,我地都覺得好唔抵,無奈愛食,有時都忍唔住要買。

原來自己整並不難,竅門只係要全部材料都要索得好乾(呢個沙律要好乾身先好食架),同埋薯仔同紅甘筍煲熟後要切厚片,放入雪櫃雪凍先切粒,就會實身d,無咁易散。 汁就係用蛋黃醬加鍊奶較到合自己口味就得喇。

材料: 

薯仔4個 /紅甘筍1條 煲熟後要切厚片,放入雪櫃雪凍先切粒,     
          

日本青瓜(幼小的那種) 2  - 去籽, 切超薄片,用鹽醃一小時,渣乾水備用

熟蛋白4切小粒

厚火腿一片切粒

洋蔥蓉 1茶匙  (隨意,可免)

卡夫蛋黃醬1 ()

鍊奶 2湯匙 (或隨口味加減)

如果呢都喜歡食薯仔,一定會超愛呢個沙律架。


2013年11月4日 星期一

咖哩炒魷魚




呢個又係睇一次整架,因為上次買左枝魚露黎整魚露炸排骨,老公話想食魷魚,就諗起我地兩個都鐘意食o既泰式鮮魷。  我知都完本係要用辣椒油o既,但係因為要就 阿B 同唔想好似o係街食咁肥膩,就只係用左咖哩粉。 個樣整出黎唔係好次泰國餐廳o個隻,不過勝再唔油膩,個汁仲好送得飯添,至於賣相,都唔大差丫。

做法一d都唔難:

-魷魚洗淨切花,再切件,用薑汁酒醃一會,

-魷魚出水,不要過熟,卷起邊食便可,撈起,過冷水。

-先爆香洋蔥,再下青椒爆一會,下1-2湯匙 (或隨喜好)咖哩粉爆香 (鑊不可太乾,否則會焦,如
需要可加小許油),再下唐芹

-下調味( 魚露 3湯匙/ 糖 1湯匙 / 雞粉小許 / 半罐花奶 / 水 3/4半碗)

-下魷魚兜炒,最後下2隻漿兜至起蛋花,試味 

-如有需要,可以小許生粉水埋芡 (但緊記汁不能太杰)

**我個人覺得,呢個菜都係要帶小小甜味先好食,不過最緊要係o岩你自己,所以試味係好重要架。

**魷魚回鑊後不能炒太耐,過熟唔好食架。

上湯肉蟹+伊麵底

Owen 每次去親飲,都會問:"唔知今晚有無龍蝦伊麵食呢?"  佢只係去飲食過兩,三次,愛上了,每次去飲都希望食到。  o係屋企整上湯龍蝦就太大工程,仲好貴添,所以將佢降低一級,用肉蟹整就有家庭 feel 好多,仲平好多添。  

  材料: 花蟹兩隻(大)

1) 蟹洗淨切件,瀝乾水份,撲上生粉以半煎炸兜炒至熟,起鑊,瀝乾多餘油份

2)伊麵兩個用熱水煮淋,隔水放進深盤中備用
 
3) 準備一碗雞湯,加入小許鹽,胡椒粉同麻油,同時準備生粉水(埋芡用)

4) 用鑊煮熱(3),蟹回鑊,逐少加入生粉水至合適濃度,隨意加蔥花,再把全部材料淋在伊麵上便成 。


**上湯份量可隨意加減。

2013年11月3日 星期日

自製午餐盒

喺太古城返左廿幾年工,D食肆食到悶哂,呢排每星期都會為自己整兩三日午餐盒,住家飯盒也可以好精美,而且配大量蔬菜,既健康又吾駛傷䐉筋,雙贏! 

呢度係上星期同聼日的午餐,成本最貴係黑豚肉餐,要三十幾蚊,其餘每個廿蚊有找,也不錯吧!




2013年11月1日 星期五

醒胃 - 西檸煎軟雞





呢個餸我想試好耐,不過成日到街買餸就唔記得左,今次終於整到喇。
我本身好鐘意食酸酸甜甜o既野,所以呢個餸同oo魯肉係我o既至愛。
天氣咁濕咁悶,食d酸酸甜甜o既食物會開胃d,加上個皮仲卜卜脆架添,好味道呀!

材料好簡單:

雞扒2件 (每件切成兩塊)
醃料: (鹽 +胡椒粉 酒)  醃至少30分鐘
之後加入1隻打散的雞蛋 ,再加2大湯匙生粉拌勻,成杰糊薄薄的包裹雞扒,最後沾上一層乾生粉便可下鑊半煎炸至香脆。

*記住炸o野要分兩段火力,下鑊時用中火,到炸熟臨起鑊時要轉大火,咁先可以將食物內o既油份迫出,炸物先會香脆架。

芡汁:
鮮檸檬汁1
醋1.5茶
 (按個人喜歡的甜味 )
1/2
吉士粉 1湯匙 ,先用2湯匙水調勻,(最後打芡用,但請留意**)

**用吉士粉液埋芡,可以令芡汁呈金黃色,但係留意落左吉士粉液後d汁會變杰,先要將汁料煮熱,調較好味道,再一面下吉士液一面攪,至理想o既杰度便可停只,但係如果顏色已經夠金黃而杰度未夠,呢個時候就可以用生粉水埋芡。

**芡汁o既醋同糖o既份量需按個人口味調較份量,而且檸檬大小有別,亦會影響口味。