2013年6月25日 星期二

Party 孖寶 - New York Cheese Cake + Brownies




老公琴日開始調組,為左搭謝同事們的照顧,佢吩咐我做左兩樣18人份量o既甜品精佢地食。  最好食,最受歡迎同最容易整o既就係呢個Party孖寶啦。
即係New York Cheese Cake 同Chocolate Brownies喇。 Cheese Cake要雪兩日先好味,所以星期六晚就焗好,放入雪櫃定型,星期日一早就整Brownies, 雪到夜晚就可以兩個一切件同加工喇。 老公話d餅好受歡迎,一陣間就無晒喇,佢自己一件都食唔到。 下次我諗要整多幾件先得喇。


Tips :  如果切出靚靚Cheese Cake:
之前有朋友問切餅忌巧,而家同大家分享Owenmama的心得: New York Cheese Cake 要切得靚,我會在煮食爐旁邊切,先長開住最細火,每切一刀前先用火輕輕燒熱把長刀,襯刀熱切餅,而切完每一下都要用廚紙抹淨把刀先再重複(餅店會用火鎗,不過住家有小朋友,就太危險了,所以我轉用固定爐火)。 呢個動作都有d危險,要小心呀。  

**呢個係大型蛋糕o既切法,如果整一般size的蛋糕,將用熱水代替火就得喇,其他步驟一樣。




各位朋友,本人已於 Facebook 開了 Fan page, 請登入以下網址送個"like"比我啦。

2013年6月21日 星期五

透心涼 -皮蛋肉鬆豆腐



夏天天氣悶熱,食下冷盤會開胃好多架。  呢味冷盤,我夏天請客必做,仲每個客人都鐘意。
呢個係台灣菜出名的涼菜 ,通常係用台式油膏做佐料,但係我就覺我自家調配o既汁料更合我口味喇,而家同供煮同好,佢好睇又好食,包你同朋友們都會愛上呀。
**呢個菜式超級易做,新手都一定會成功架。
食譜:
百福豆腐兩件 / 皮蛋兩隻切粒脆口肉鬆適量
醬汁(用量匙份量): 4茶匙 + 熱水1湯匙 / 蠔油 2湯匙 / 生抽2 / 麻油隨意
**不同牌子的調味料鹹度不一,要試味同自行調節呀。
1)   豆腐倒扣再碟上隔水 5分鐘攤涼,蓋好, 放在雪櫃雪凍 (豆腐會出水,要不時倒去水份)
2)   舖上肉鬆,皮蛋粒,蔥粒 (配料要放在豆腐上面,以防被豆腐流出的水浸濕)。
3)   最後淋上適量醬汁便可。
**醬汁不用下太多,建議用小碗盛起 on the sided,客人可以隨意添加。

2013年6月18日 星期二

LC 梅菜鯇魚煲仔飯







今晚同Owen 仔的二人晚餐 - 梅菜鯇魚煲仔飯,只$20材料費咋,d飯粒粒分明仲有飯焦食,配埋煲仔飯豉油,Yum Yum!  
老公好鐘意食"一粥麵"午市o既梅菜鯇魚煲仔飯,但係好多次去到都賣晒(每日只賣幾客),每次都要同人鬥早買先有幾會,而家屋企整到,以後唔駛同人爭喇。


食譜(我用La Creuset 18cm):

1)2杯米用水浸20分鐘,放入LC煲加水(1:1)大火煮至水滾,其間用筷子攪動米粒

2)轉小火, 蓋上蓋煮兩分鐘,開蓋,(此時水已差不多全被吸收),加入鯇魚(見) 再用手捽和甜梅菜粒(見)

3)再度蓋上煲蓋,最細火煮十分鐘,之後熄火焗十分鐘便完成了
**想有飯焦則在最後一分鐘轉大火便可

註:鯇魚處理:  沖水,用生粉捈在魚上,一面沖水一面用手指捽,可去腥及更乾淨
梅菜處理:  (要甜梅菜)用水沖乾淨,浸半小時,搾乾水,切粒 (梅菜份量可以減少dd)

 
呢個狀態就可以加入魚同梅菜喇。



不黏底,但有飯焦,如果老公o係度就o岩晒佢喇。




2013年6月17日 星期一

簡單,美味 - 芒果牛奶布丁 (父親節快樂)



一如以往,父母親節正日晚餐都會在我家食,吾使同人迫。 祝眾父親有個溫馨父親節呀!
老公之前胃病,要清淡所以好耐無整過甜品喇,剛好返d,琴日又係父親節,就整個最簡單o既甜品比佢同家人食。
雪櫃有大半盒淡忌廉,加埋我早餐o既脫脂奶,都係剩物資,溝埋用黎整左個牛奶忌廉布丁,再o係上面用熟透o既芒果肉打成蓉,放係布丁上面,就成為呢個簡單得黎,好睇又好味o既甜品。
好好彩買到又平有靚o既呂宋芒,家人對我呢創作激讚啊,老公仲order 30號請同事黎食飯時要整返呢個甜品添。

鮮奶忌廉布丁食譜:
7小樽份量(7分滿,預留位置比芒果蓉)
材料: 200g 淡忌廉,300g脫脂奶
魚膠片 兩片(5g一片)
砂糖40g 左右(或隨個人口味調教)
芒果(三個,用攪拌機打成蓉,雪凍備用)
做法:   
.將牛奶 、糖加熱,不必沸騰,糖溶了就ok
2.加入先用冷水浸軟的魚膠片,攪拌至完全溶化熄火,加入淡忌廉混合
3.等一會至暖,倒進溶器,雪約7小時至凝固(如隔日食,用1 3/4片魚膠片就得啦)
4. 將適量芒果蓉放在布丁上,完成。
溫馨提示:
緊記全過過程要用最細火,不可滾起。


住家父親節晚餐,自己煮,唔駛同人迫。




2013年6月13日 星期四

家鄉煎粽子

 
 


 
煎粽係老公的家鄉食法,佢細個奶奶會咁整比佢食。   奶奶去世多年, 琴日我都煎左隻比佢食等佢回味一下。    呢個整法令粽面微脆,再用砂糖伴食,一絕呀!   連一向唔食粽o既Owen都話好味呀,多謝老公教我呢個做法,雖然功夫多左,但係真係好食好多呀 (尤其係個鹹蛋黃,更香呀)!

做法:粽先”丁”1分鐘,去葉切開用易潔鑊煎香 (切時刀要濕水,唔係好難切得靚)



2013年6月5日 星期三

翠塘豆腐 




呢個改良版蒸水蛋係Owenmama o既自家菜, 亦係Owen最喜歡食,其實好簡單,只係在蒸水蛋上淋上一個加左蟹柳絲o既玻璃芡,仲可以加菜粒 (芥蘭同菜心都得),咁就會無咁齋,更加送得飯,個賣相仲會靚左。 如果宴客,想高貴d,可以用帶子,蝦粒,(預先用水煮熟)代替就更正喇。
每次我話整呢個菜式,佢都會大叫 : "好o野”" , 然後o係食完飯收碗o既時候,佢就會返埋飯檯,同我清晒剩底o既蛋,仲會好比心機用匙羹將黏o係碟邊的蛋都清埋,我同佢daddy就會坐住欣賞佢呢個為食相(無作大架,下面有相為證架

食譜

蒸水蛋底

-蛋四隻打散,
-加入雞湯 (份量為蛋的1.5)充份混合
-將蛋液過篩,到進深碟中
-蓋上微波爐保鮮紙,中火蒸9分鐘至剛熟

**時間按碟的大小自行調節。


蟹柳芡汁:

-雞湯250ml + 鹽小許 / 菜粒 / 蟹柳(撕成絲狀) / 生粉水適量
-雞湯+鹽小許煮滾,轉小火下菜粒,至菜粒剛熟,下蟹柳絲
-下生粉水埋薄芡
-將芡汁倒在蒸蛋上便成










 

2013年6月3日 星期一

油鹽水花蛤







而家有雞湯o既幫忙,想整出同出面口味差不多o既菜式唔再o係難事。 我地一家係海鮮怪,附近街市又多平靚海鮮賣,所以經常有得整。
今次我買左30蚊花蛤,整左呢煲簡單的用油鹽水煮,加d紛絲,老公同仔仔讚不絕口呀。   雞湯加埋花蛤汁真係好正呀, 仔仔仲用d湯黎整湯飯,最後湯都無滴剩呀。

好快手就整好呢味避風堂酒家小菜,份量仲比出面多成倍,但係又平好多架。


食譜:

鮮花蛤一斤 / 雞湯600ml / 頭菜一件(約2吋x1吋,切粗條),胡椒粉(隨意),粉絲1小包


1)花蛤徹底洗淨,瀝乾水備用
2)600ml雞湯 (如無雞湯,可用清水加雞粉代替) ,加入頭菜條,加胡椒粉煮滾,
3)下花蛤及粉絲,煮至花蛤開口
4)試味,灑上蔥段即成 (好隨喜好加點麻油)。

溫馨提示:
*我個人覺得多d胡椒粉會惹味d,所以都落左幾多,個湯辣辣地好開胃。
*頭菜本身已有鹹味,加上花蛤的鮮甜,不用另加鹽也ok。
*用蜆更平,但係好多時都會有沙,用花蛤就一定無沙啦。