2013年10月29日星期二

栗子排骨煲







同事帶左我去筲箕灣權發食晏,食左個好好味o既栗子排骨煲,急不及待返屋企整比老公食。 呢個煲仔菜簡單又好味,不過記住煮呢個餸要煮多d返,因為呢個餸好送得飯架。

材料:

薑數片 / 蒜數粒(拍扁) / 排骨一斤 / 栗子12

做法:

1)
排骨洗淨,抹乾水份,以生抽,糖,生粉,油醃不少於一小時
2)
排骨走油至8成熟,離鑊,瀝去油份備用,(我唔想浪費太多油,只用了約4-5湯匙油份將排骨爆至四面變色,約8成熟)
3) LC
煲仔下油,爆香薑,蒜,至聞到香味,排骨回煲仔爆炒, 贊酒,炒一會,下水,差點蓋過排骨便可
**(
LC煲存水,故不用下太多水,如用其他煲,則要加多一點水份)
4) 下栗子,同時下小許蠔油,生抽,糖作初步調味
5)
滾起後蓋上蓋,轉最小火,炆約25-30分鐘,
6)
開蓋再作最後調味,再以生粉水埋芡便可上桌

白酒梨 x 天使蛋糕






之前睇獨角仙o既白酒梨撻食譜,已經好想整黎試下,前日見到生過店有長咀梨賣,就買左兩個試下整。  但係原先個梨撻同餡都係用杏仁粉做主材料,但老公就唔鐘意食杏仁味o既甜品,但係梨已經煮好,就唯有改一改,將天使蛋糕同白酒梨crossover,中層再加入少少未煮過o既梨肉粒,  出奇地呢個配搭好清新,家人同鄰居都讚好味添。
o既處理係跟獨角仙”o既食譜,但係因為我個梨太生,所以細我煮左半個鐘先得,同埋我加多左蜜糖o既份量,個梨充滿蜜糖香,好好味呀。





 白酒梨製作中,我呢兩個好生好硬,所以我煮左半個


 煮好要浸隔夜,浸完白白滑滑鐘。













切開都好靚,充滿蜜糖香味 (因為我落多左蜜糖)


中間層加上新鮮梨粒,口感好爽甜。


 開始最難部份 - 抿忌廉
  抿得麻麻地,剛合格吧!


2013年10月28日星期一

日式咖喱蛋包飯







琴日早餐時,三口子商量晚餐餐單幾個提議之中,兩父子異口同聲話好耐冇食過日式咖喱蛋包飯,見Owen 進入測驗週,就順下佢意,當係同佢加油囉!

咖喱磚在日式百貨公司買嘅,半盒份量,加700g水就煮出美味咖喱,我只是加左D糖調味,日式咖喱煮得耐會太杰,薯仔粒我係預先切粒用水煮淋(再沖冷水備用),咖喱快煮好再放入去加熱就得 (注意D汁吾好煮咁杰,如太杰則加些水調較)

蛋包飯都有少少技巧,不過都唔係太難,下面就係個流程圖,做多一兩次,就會熟能生巧。

不過都要多謝老公,幫我打雞蛋同裝飯,兩對手一齊嚟就可以快速完成啦。

因為我的飯碗大,每個飯要用兩隻雞蛋先至包得晒,如果飯的份量少,可用較細的平底鑊,蛋的份量也可以酌量減少。




7喜提子鬆餅



今日傢俬店甩底, 突然改聽日先送貨。 o係屋企好無聊,想整蛋糕,執屋但係連個磅都掉埋,諗起之前睇過blogger T&P 示範o既 Lemonade Scones 只需用量杯,材料超簡單(汽水-我用7喜,自發粉同忌廉),就試o下做,果然容易,好似樣呀,搽果Jam襯熱食確係唔錯。
  

佢仲令我諗返起o係我讀中學時最鐘意o既肯德基牛油焗鬆餅,不過無得賣好多年喇。

(今次做左半份,我驚太淡口,o係自發粉內加入1/2 茶匙鹽同2茶匙糖調味,再加入浸軟左o既提子乾,好好味)。

不過記得要焗得熟透,唔係會有"生麵粉"味架。 


我o係Youtube 搵到個Demo Video (click here)

有 示範Video, 想失敗都幾難呀! 真係無得頂!

*****************************************************************



各位朋友,本人已於 Facebook 開了 Fan page, 請登入以下網址 add 我啦。
以後大家除左可以上Yahoo blog,仲可o係 Facebook同我溝通呀!

2013年10月27日星期日

簡易焗雞配新薯雜菜




睇完廖碧兒o個集名人飯堂,見道佢整左個焗雞,好想食,(經常黎探我o既blog 友都知我係雞怪),今日有機會就即整,不過,我呢個係簡易版,雖然只用鹽醃,並無落其他香料,但係真係唔錯,d雞皮脆卜卜,Owen 同老公仲比100分添,一陣就成隻食光;從此請客食譜又多個選擇啦。

材料:
三黃雞1(較大)
鹽 3茶匙鹽  (如雞較細要酌量減少鹽)
油+牛油小許 /  黑椒小許
蔬菜 - 隨意
(我用左新薯6粒,一開為二,洋蔥,甘筍,翠玉瓜)

做法

-雞洗淨,抹乾,用鹽塗勻(包括肚內),
-深碗內放蒸隔,把雞放再上面,醃最小3小時 (使雞乾身)
-雞塗一層薄油放焗盤上,再放蔬菜切好
-放入已預熱15分鐘(220度)焗35分鐘,取出,於雞皮想塗一層薄牛油,灑想黑椒,再侷15分鐘 (時間長短視乎雞o既size而調較)

*呢個時後,所有蔬菜都會被雞油煮熟,好好味,唯一係原來都都幾多油架

*我並無釀任何材料再雞肚內,亦無封口(因為我直情將個雞Pat Pat切左,同埋我諗咁樣d熱氣可以直接入雞肚內,隻雞會快熟d。

*我發覺部份油係o係切雞時流出,吸取呢次經驗,下似將隻雞分碟切可能會好小小

擎乾水後d雞皮會變成薄薄,焗出黎就會好脆架喇。







酒香鹹雞







雞係我o既至愛,但係自從我地雞市無新鮮雞買,都好小整白切雞食。上星期突然想食, 就用霸王手撕雞o既方法(上次係用鮮雞脾),用鹽醃鹹,再加d酒可以幫手蓋去雪味,整出黎味道鹹鹹地,仲有淡淡酒香,確係唔錯 。 你地可以參考o下架。
食譜:
大型冰鮮雞一隻 (新鮮雞更好)
鹽 - 2湯匙 (若雞較少則要減少鹽份)
酒 - 白蘭地  / 花雕 各2湯匙 (玫瑰露亦可)
1) 雞洗淨內外完全抹乾, 以鹽擦勻內外,醃3小時, 再加酒醃3個小時
2) 隔水蒸40分鐘,撈起立即放進凍水中浸頭分鐘。
(用筷子由雞脾位刺入雞內, 刺到底部,如流出的汁無血水,即雞已熟)
3)撈起, 於雞皮上塗一層薄薄的麻油,待雞稍攤涼便可斬件上碟,  將部份雞汁淋再雞上更好。

**雞汁可用作炒菜或浸蔬菜用(唔會浪費)

暖笠笠 - LC 臘腸滑雞煲仔飯








天氣涼涼地,最o岩食煲仔飯,加個油菜,一家人暖笠笠又一餐喇。


d雞好易處理,之要同生抽,老抽(小許,加食用),糖,鹽,酒,生粉,麻油醃最少1至2小時就得喇。

整呢個配搭o既晚餐,老公最鐘意,點解?因為最少碗洗嚕。哈哈!


****************************************************************
各位朋友,本人已於 Facebook 開了 Fan page, 請登入以下網址 add 我啦。
以後大家除左可以上Yahoo blog,仲可o Facebook同我溝通呀!

烤春雞餐


 



是日晚餐三隻烤春雞,每隻$18,加埋side dish - 雜菜加薯角,$80的三人豐富晚餐!

700g雞,解凍,徹底清洗胸腔內臟,抹乾,用3/4茶匙幼鹽捈勻內外醃最少三小時。
焗爐預熱220度焗25分鈡(臨焗時捈小許油,灑上黑椒)

*我地三個人一人一隻,有D多(但吾跟返兩隻又吾夠)有兩件雞胸內留起了整三文治做早餐。 


    

2013年10月26日星期六

白玉珍珠 - 蝦膠蒸豆腐 (蛋白芡)





今日家人聚,一個人去左灣仔街市睇o下有乜野可野買,見到d蝦真係又平又靚,就買左一斤返屋企打蝦膠,老公呢排超鐘意食豆腐,又啱老人家食,就試o下整個蝦膠蒸豆腐,完全無難度。

材料:
蝦膠一份,豆腐兩件切成小件(我用盒裝的)
上湯適量,蛋白一隻,生粉水小許

1) 豆腐切小方件,抹乾,在頂部灑小許生粉,放上蝦丸
2) 隔水蒸8分鐘 (因蝦丸較大)
3) 蒸好煮滾上湯,熄火,立即加入打開的蛋白,推成成蛋花,之後加入胡椒粉,
再開小火,加入適量的生粉水,成流離芡,淋上便可上桌。

見個樣咁靚,蝦膠彈牙,豆腐超滑(我用左百福),呢個"白玉珍珠" 要黎款客,一d都唔失禮呀。
 
食譜: 蝦膠食譜

 **留意: 蒸的時候,我打開了少許鑊蓋,減少倒汗水,蒸好後再用廚房紙溯去餘下的倒汗水才淋上芡汁,咁先至夠靚同好味架。

2013年10月25日星期五

秋風起 -臘腸蒸雞







天氣轉涼,食呢個餸最好,好味又送得飯。

做法好容易:

雞半隻,切件洗淨,用糖,鹽,生抽,生粉,紹酒,薑汁,油醃兩小時

臘腸洗淨切斜片, 連雞一同蒸20分鐘便成 

*蒸好後打開鑊蓋(火仍開),試汁味,如果唔夠味,好以o係呢個時後加生抽和糖調至合適口味。
*因為臘腸同雞都會出油,試味前用鐵匙撇去一點油更好。

2013年10月24日星期四

自家製叉燒 (附自家食譜)






唔講唔知,我爺爺係賣燒臘的,不過,細細個,我地住o係鴨脷洲,係一條好細好古舊魚村,就成日見都佢係佢屋外面o既古法炭燒爐燒鴨同叉燒,放學見到佢架流 動販車,就會行埋去,爺爺就會切一舊叉燒頭比我食 (記住,係叉燒頭,雖然係下欄o野,但係我一d都唔介意,就係鐘意佢朕焦燶香味)。  佢過左身20幾年,一定估唔道而家佢個孫女都識整叉燒嗟。

雖然唔係古法炭燒,不過味道一d都唔失禮架,d朋友大讚好味,仲幫我勾起好多小時回憶,真係別有 滋味呀。



食譜 (自創簡易食譜)

半肥瘦梅頭肉兩大件 (回家切成叉燒條狀,要將厚的地方加刀薄,太厚的叉燒唔會好味)

調味: 生抽 + 糖 / 梅瑰露 / 叉燒醬

掃料:蜜芽糖+水 (只加小許水,坐水攪勻成漿,會易掃d)) 或蜜糖

1) 豬肉洗淨,抹乾,用生抽+糖醃+梅瑰露酒醃兩小時 (醃料要較甜,生抽不用太多,否則會太鹹)
    *目的係令肉有味,唔會淡貿貿

2) 加入叉燒醬醃兩小時

3) 焗爐預熱230度,把肉放進焗10分鐘,取出,掃叉燒醬(要均勻),再焗5分鐘,再掃一次醬,再焗5分鐘

4) 取出,將叉燒轉放再焗架上,下面放盤 (盛肉汁),掃上一朕蜜芽糖水,再入爐焗至焦香便可上碟。

   *用蜜芽糖水會濃d,我爺爺都係用蜜芽糖架,不過如果無,用蜜糖都唔區。
   *個別爐溫同叉燒厚薄都會影響焗o既時間,最緊要睇火呀。



紅燒鯇魚腩伴蠔油炆枝竹 (附食譜)




今日係星期六,又有煮飯仔玩喇。差唔多9個月無整呢個餸喇,唔係老公提議整,我直程忘記左佢添。 其實呢個餸好好,d魚腩香脆入味,唔點汁都好好味,鐘意點d汁有得,d枝竹又好餸飯真係好值得推介比大家。

鯇魚腩一個,切條(老闆代辦),洗淨抹乾 用醃料醃兩小時

急凍濕枝竹8片 (凍肉店有售, 唔好買錯腐竹呀) ,用水煮10分鐘,撈起待用,如喜歡"淋"d,可按自己喜好煮多一會

醃料:老抽1/2茶匙 / 生抽2湯匙 / 糖1.5 / 薑汁酒1湯匙
汁芡:蠔油 / 生抽 / 糖 /水 /  生粉水適量

做法:
1)魚醃好取出,用紙索去醃料,加入1湯匙生粉撈勻。
2)用中火炸熟魚條,撈起用蒸架擎油,待翻炸
3)用另外一個鑊,倒入芡汁和枝竹,煮一會,加生粉水埋芡,上碟備用
4)燒熱剛才炸魚的油(至滾),魚條回鑊翻炸至金黃脆身,襯熱排放再枝竹芡上便可上菜。


貼士
1) 好似我咁用易潔小煲咋野可以用小d油
2) 魚先炸一次再煮汁,因為第二次翻炸係好快,咁做魚都會熱辣辣,脆口而d汁仲係熱o既。





泰式海鮮沙律






朋友仔請食飯,整左呢個海鮮沙律去做手信,就換到一餐豐富晚餐,好 著數呀。呢個沙律我想整好耐架喇,酸味味,好清新開胃架。




材料:

-海蝦 (挑腸,開背) / 魷魚 (切花) - 兩樣一起用水煮熟,撈起過冷河,隔水雪凍備用

-粉絲(浸軟,出水,快速撈起過冷河,隔水備用)

-洋蔥(切絲,先用鹽醃半小時,沖水,再搾乾水,與粉絲混合),

-蕃茄仔 (切半),芫茜 (切段被用)

-唐生菜 (舖碟用)

醬汁: 檸檬汁,魚露,泰式雞醬,沙糖

-碟底舖上數片生菜裝飾,將搾乾水的洋蔥絲,加粉絲及小許醬汁混合,舖於生菜上


-舖上蝦,魷魚,蕃茄仔及芫茜


-上桌時再均勻地灑上另一次他醬汁便可。

豉汁bb象拔蚌







除左龍蝦糯米飯,呢個係第二味,蒜蓉豆豉蒸"bit"水bb象拔蚌。買龍蝦時見到架,阿b最愛呢個菜,不過因為龍蝦會用蒜蓉蒸,呢個就改為用蒜頭豆豉汁,仲惹味呀,我就最鐘意d粉絲啦。

蕃茄炒蛋 (附食譜)






蕃茄炒蛋,好開胃,顏色又鮮艷,好滑滑,非常符合我呢餐o既要求。老公同 阿B見到流晒口水。
你個係我自家食譜,嚴格o黎講係蕃茄汁撈蛋 (睇o下就知點解), 我無睇過阿蘇係點整,不過相

信呢個會簡單d :

材料: 蕃茄 2 (大)    水   2湯匙        茄汁  1/3枝    糖  1.5-2湯匙 (視個人口味加減)
              大蛋  6隻

我先會整左個汁先 ,好簡單:

蕃茄兩個,一開6,再將裏面jelly狀種子同肉分開,落鑊炒至半熟 (d jelly會溶晒),再落茄肉兜炒,1/3枝茄汁,1.5糖調味,兜勻,試味 待稍為收杰,酸甜o岩自己就得啦。

6隻蛋加小小鹽打勻,易潔鑊下4湯匙油燒熱,下蛋轉中火,慢慢從外至內推,勿大力炒,推至蛋9成熟,再將茄汁加入輕輕兜勻便可啦。(蛋太孰唔滑)

**有人會o係蛋到加生粉水或油,話會滑d,但係我覺得呢個菜唔需要,煮多幾次,掌握到炒蛋技巧就無問題啦。

**蛋同蕃茄係分開整最後先合成埋一齊,一齊係鑊o既時間唔多,所以嚴格只可以叫:"蕃茄撈蛋"  哈哈!!!!!

煙肉龍脷柳卷,伴西蘭花 (附食譜)









呢個一定要介紹比大家,上得"大枱", 請客實無失禮,最緊要係簡單,好好味架。

材料及做法:

1) 西蘭花一個(小) - 切細,用油,鹽糖水煮熟伴碟

2) 龍脷柳切小塊,用小許胡椒粉醃一會,再用煙肉卷好(見小圖)
   **煙肉不可捲太厚,否則好難熟。

3)  慢火煎魚塊,接口先向下,煎至定型才轉面,不可心急,四面都要煎,make sure   魚要煮熟。

4) 可隨意用雞湯打玻璃芡 ,亦可刪除。

自家製菜飯 (附食譜)





今朝起身就即刻設計今晚o既晚餐,老公成日都心思思想去大x樂食菜飯,不如時下自己煮,仲會整多兩個未整過的新菜添,我都未試過架,不過應該無乜難到o既,最多咪無人咁好味嗟。我不嬲煮野都有無窮衝勁同毅力,整係諗希今晚有得試整新野食就好興奮啦。  而家先同你地分享菜飯先啦。

用左珍珠米製成品彈牙又煙韌,真係有大x樂咁上下好味架。






材料:
小棠菜半斤,切粒 / 薑米一茶匙 / 珍珠米 (6碗飯的份量)
********************************************************************
1) 下小許油炒香薑米,下菜粒兜炒,贊小許酒,下鹽調味,盛起備用



2) 米洗淨加水和雞湯(我煮三杯米,下了兩杯水+一杯雞湯),亦可隨意調教雞湯同水的份量。也可只加清水 (雞湯份量越多則越濃味)

3) 當飯煮至8-9成熟,便可加入菜粒,快手拌勻,蓋起繼續煮至全熟。


吮腳指 - 沙薑雞腳 (附食譜)










呢味餸唔係個個都鐘意食(包括本人,雖然好味,因為好多脂肪,怕肥!),因為個樣都有d嚇人,但係愛佢o既人,見到佢就流晒口水喇。不過無奈老公同佢家姐都係吮腳指一族,去大姑奶屋企食飯,又唔知買乜上去,就整佢兩個o既至愛,點知連佢o既印傭姐姐都話好食,一陣間就掃晒成盒啦。仲要我教佢整添

 
其實做法簡單到不得了,我並唔係用沙薑粉,係自創用鹽焗雞紛整,咁就乜野都唔駛再加啦,係懶人o既做法,不過味到同係舖頭食到o既一模一樣架:
 
材料:
急凍雞腳 (我買左20隻)
四季鹽焗雞粉(3-4包)


做法:
-雞腳徹底解凍,煲滾水,下雞腳,水要足夠蓋過所有雞腳
-蓋上煲蓋,煲約5分鐘,同時準備一盤冰水
-撈起雞腳,即放進冰水中,至雞腳完全冷卻,倒去冰水備用
-鹽焗雞粉用水開好(先開3包),煲另一煲水,水要足夠蓋過所有雞腳,水滾後下粉液,試味(如不夠味就多下一點鹽焗雞粉), 因人人口味不同,可按自己口味加減。
-下雞腳,轉中火炆約45分鐘 (可撈起一隻測試夠不夠"林",鐘意"林'd開再炆多一會),再熄火,揭起小小煲蓋,浸起碼一小時 ,可令雞腳更入味
-臨食再加熱,撇油(會標好多油架),撈起上碟,加麻油便可

**剩下的汁可用密封容器盛好,放進雪櫃,留一至兩星期再用。

2013年10月23日星期三

Panna Cotta 配香甜粟米片






Panna Cotta 意式布丁,呢個甜品好香好好味,我見個雪櫃有阿B  o既香甜粟米片係度,我諗配黎食會好正 (一個"林",一個脆,口感好特別)。 於是突登落好小糖o係Panna Cotta 度(只落o左平30g吊下味),原來呢個食法好Perfect!!

做法非常簡單:

材料:低脂奶250ml、淡忌廉250ml、魚膠片2 1/3片,雲呢拿油少許、砂糖30克(或隨意)

做法:  1.將忌廉、牛奶、糖加熱,不必沸騰,糖溶就得,
               2.加入雲呢拿油
               3.加入事先浸軟的魚膠片
               4.倒進溶器,雪至凝固, 用暖水浸一下倒扣脫模

** Panna Cotta一定要好小甜至得,因為原來d粟米片真係勁甜架,唔怪得d細路咁鐘意食啦。

一粒鐘真人show (2) - 蝦仁炒蛋






(蝦仁炒蛋 圖中份量)
中蝦 (一斤)      蛋6隻  蔥(隨意)  魚2.5茶匙

蝦剝殼,挑腸,起雙飛(背切一刀),用2湯匙豆粉拌勻,沖洗,重覆兩次。 瀝去水份,抹乾,用1/2茶匙鹽+白胡椒粉醃一會。

蛋白和蛋黃分開,蛋黃下魚露約2茶匙拌勻(視乎個人口味),把已調味的蛋黃和蛋白混合,不要拌太久,幾下就足夠),平時我會在蛋中加1湯匙油,等佢再滑d,但今日亞b唔可以食咁肥,我無落。

開鑊,下小量油兜炒蝦仁熟(一定要油熱透才下鑊) ,撈起用篩瀝水(約10分鐘),瀝乾水份備用(炒完後會出小小水,要瀝乾, 唔係就越食越多水啦。)。

用易潔鑊下油3湯匙,要"廊"鑊,確保鑊上大範圍沾油( 蝦仁回鑊,下蔥花,下蛋漿,由鑊邊輕力向內推成滑蛋。  不要太熟就會成為滑蛋。

麵醬蒸豬肉 (食譜)







今日本來plan好一家人去食日本o野,但係今日ah B忽然勁咳,連學校都打比我提我今日要帶佢去睇醫生,老公o黎左太古踢波,所以放工就落球場搵佢車我去返屋企,同時亞B做完功課,就請Mammy帶亞B去睇醫生,醫生話佢氣管炎+感冒,於是都係取消食日本菜,拿拿淋就去買餸,目標係: 快 / 靚 / 正 / 清,因為亞B要戒口,食清d。

買完餸已經6點11,8點前要開飯,真係要快手,今日菜單好easy, 焯生菜,蝦仁炒蛋同今日介紹o既蒸梅頭,全靠老公丈義出手洗蝦挑腸,唔係就唔可以係法定是間完成 (因為買o左一斤蝦,好多隻,有排攪)。


酸梅麵醬蒸梅頭肉:

梅頭豬肉$25        酸梅 2粒       麵豉一包(約兩平湯匙)
糖2湯匙       豆粉1茶匙     油一湯匙

 
做法:
梅頭豬肉洗淨切薄片,用酸梅+麵豉醬+糖拌勻,最小要醃20-30分鐘,臨蒸是下小去豆粉,拌勻,最後加油拌勻,蒸約12分鐘便可。
蒸完記得試下味先上菜,如太鹹可多加糖,因為每個人的口味都唔同。