2013年5月26日星期日

Owenbaba生日快樂

 



琴日係Owenbaba 阿仔突然話要用利事錢請Daddy食生日飯,重好堅持,見佢咁有心就應承佢,我地又吾想佢破費所以取消出街食,改為買返屋企食,檯上面除左我整嘅凍龍蝦同南瓜天婦羅,全部都係佢請,雖然吾係乜野高貴嘢,但係心意無價,多謝Owen, we love u, muah!

原來o係屋企咁慶生都唔錯喎。



第一次做Boss比錢,我諗佢都赤赤地架,hehe....


 

2013年5月21日星期二

Tiramisu







上個星期一次過慶祝部門兩個同事生日,我整左呢個Tiramisu 比佢地 (食譜來源: 美味DIY)   路經公園見到好多落葉,靈機一觸,執左幾片返屋企,洗乾淨,抹乾用黎做朱古力裝飾, 特別d無咁單調 ,效果都好靚,有份食o既同事都話d葉好特別呀。


同場加映兩個細杯裝,係上兩個星期同事離職派散水餅,佢買左Paul Lafayet 靚餅,其中幾個係用佢自家o既靚杯杯裝架。我叫d同事食完將d杯比我,唔好掉左佢咁浪費,o個壹咁o岩有少少材料用剩,就整左兩杯細杯比老公 同仔製享用,用左呢d小杯,成件事貴氣晒。


樹葉印模裝飾,,把預先座水溶的裝飾用朱古力厚厚的抹在葉上(底向上) 等朱古力凝固,便可小心撕去樹葉,變成美麗的朱古力裝飾了 (用最環保的落葉,仲唔駛用錢買架)。






2013年5月20日星期一

繼續醉 - 鴨舌





今次用左鴨舌,做法同醉鮑魚(食譜按此)一樣,今次浸左兩晚,好入味,充滿酒香,喺呢D濕悶天氣食就最開胃了。  

出面買鴨舌一d都唔平,今次都係o係柴灣凍肉批發買,2.2kg賣到158蚊,好大包,仲要係大鴨舌,平好多呀。

溫馨提示:我會在過冷河時用牙纖剌穿鴨舌中間,唧出中間的液體,再用熱水沖洗乾淨先下醉汁。感覺會乾淨D!



***********************

各位朋友,本人已於 Facebook 開了 Fan page, 請登入以下網址送個"like"比我啦。
以後大家除左可以上Yahoo blog,仲可o Facebook同我溝通呀!

2013年5月16日星期四

白汁菠菜三文魚意粉








之前o係太古城Apita日本節買左一盒鹽乾三文,特價$230有13件,放o係冰箱可以放個半月架。  有d同事都跟左我買添。

但係今次比上次買到o既鹹好多,雖然都好食,但係就有d鹹魚Feel, 煎香左一件可以送兩碗白飯架。  我就覺得佢左D,所以諗緊有無第二D食法。

前兩日同老公我同老公去左Apita foodcourt 北之板食飯,我地都好鐘意O既白汁菠菜三文魚意粉,琴日我將d魚佢蒸至8成熟起肉,用上湯,奶,忌廉同菠菜,煮左個足料A貨呀,呢個食法比煎香食更得呀! 咁又多個食法喇。



食譜:


1/3包意粉
鹽乾三文魚2件,大火蒸4分鐘,拆肉,用滾水沖去油份備用。
雞湯120ml, 3湯匙,忌廉2湯匙 (用鑊煮滾) ,準備一湯匙麵粉,加一湯匙水埋芡用。
將煮好的意粉用格篩撈起,直接投進湯內(不用過冷河),加入菠菜,煮至菠菜軟身,放入三文魚塊略煮,用適量麵粉水埋薄芡便可上碟。




 
 


 
 

2013年5月13日星期一

我的另類禮物 - From Owen的蝦仁炒蛋





今個母親節,我無收到花,亦無收到禮物,但係Owen就親手整左一味蝦仁炒蛋比我食,除左買蝦,其餘去殼,去腸,調味同炒都係親力親為,我出口,佢出手,合作好愉快,亦好成功呀! 佢話下次唔駛我提水,自己攪掂喎。

從未食過咁甜o既蝦仁炒蛋,多謝仔仔呀。








2013年5月11日星期六

開心雀局菜 - 蜜汁豬頸肉 (附食譜)



好耐未試過咁開心啦,星期五打完牌,琴日又約o左雀友黎我家打台灣牌(因為Ah B去同學屋企, 10點先返黎,佢批准我星期六可以開枱)。反正老公o係度,我地兩個要輪流作戰,不如佢打o既時候我去煮飯,咁就可以消磨o下時間,唔駛做咁耐"塘邊鶴"。
老公話我好耐無整過燒豬脛肉,好想食咁話喎,咁就整啦,反正好容易。 呢個係我自家o既食譜(因為老公唔食香料,所以唔可以整泰式)。


做法:

1) 老抽,生抽,糖同玫瑰露(一定要玫瑰露,唔可以用其他酒,唔係就唔係無叉燒風味)醃最少3小時,臨煎時倒掉醃汁,落小許油拌勻。
2) 煎到好似上面咁,要小小焦至靚,起鑊,
3) 最後用小許糖加小許水煮邊透明糖漿,或簡單地用小去蜜糖+水(視乎豬肉份量,不用太多,只要好薄一"浸",豬脛肉回鑊一兜即成。 好有叉燒風味。


**第(3)步可按個人喜好,有d人唔鐘意甜。
**有時間的話,好以在(3) 後放入焗爐焗乾身小小,仲正。
**上面圖片係未進行(3)步,因為相機忽然無電,兜完糖漿仲立立令d。不過而家都唔差架。

開心雀局菜(2) - 雲勝炒魚鬆 (附食譜)




呢個係第二個餸 (其他係油鹽水蜆同日式甜咖哩,以前鋪過,唔再鋪啦)。
呢個係一個好簡單,家常到唔家常o既餸,其貌不揚,但非常下飯,底脂兼口感豐富o既餸。

材料:

洋蔥半個     雲耳 2蚊     勝瓜一條(大) 
魚鬆 10蚊(事先加麻油,胡椒粉,蔥花拌勻,煎香切條)。
1) 先爆香洋蔥, 再下雲耳(浸軟)
2) 再下勝瓜+小許鹽兜炒一會
3) 鑊邊贊紹興酒小許,
4) 下事先煎香的魚鬆加入
5) 下調味 (蠔油,生抽,糖,小許水),試味,兜勻即可上碟。

2013年5月10日星期五

芒果椰汁西米





呢排d芒果有平又靚,老公恨食左好耐o既芒果椰汁西米撈出終於出場,我呢個勁多西米,仲

有用芒果肉打成汁o既版本,加埋雪凍左o既芒果粒撈黎食,真係好very good ah:)


食譜:

芒果三個 (兩個切粒,另一個切粒,用攪拌器打成汁,放入雪櫃備用)

600g

Kara
牌椰汁一盒

冰糖100g (隨口味加減)

西米 隨意,(我鐘意勁多,但係有d人鐘意多椰汁,所以隨意啦)


做法:

1)
水加冰糖煲成糖水,襯熱加椰汁攪勻,徹底攤涼

2) 滾水放入西米,轉最細火開蓋煲約10分鐘 (煲至西米只見一點白色在中間),熄火,至透明、過冷河,隔水備用

3)
把西米加入椰汁內,雪凍便可隨意加入芒果粒和芒果汁享用。


**************************************************************
各位朋友,本人已於 Facebook 開了 Fan page, 請登入以下網址送個"like"比我啦。
以後大家除左可以上Yahoo blog,仲可o Facebook同我溝通呀!






2013年5月3日星期五

醉鮑魚


五一當日o係我屋企為我的Darling Daisy提早慶生,當日其中一味就係呢個醉鮑魚。

本來諗住清蒸,但係因為買左條石班,咁兩樣菜式o既味道就相撞左,反正朋友們未試過食醉鮑魚, 就將佢轉一轉,等佢地視下。 本來呢個菜要浸隔夜先最好食,好彩o個日一早去左買,計下都有7個鐘頭浸,即管搏下。結果都ok喎,個個都話好食呀。

呢個餸大睇又好食,做法仲好簡單,不過因為買左15隻(約斤半),擦鮑魚就擦到手軟。




食譜:鮮活九孔鮑魚(買較大的較好)
汁料: 醉雞汁,水,酒 (我用左花雕 + 玫瑰露 + 白蘭地)

1) 鮮活鮑魚用擦擦淨,用水徹底清洗
2) 燒滾一鍋水,水要浸過全部鮑魚
3) 下鮑魚煮約2分鐘 (不要煮過熟)
4) 撈起過冷河,再脫殼,再徹底洗一次
5) 將鮑魚排再大碗中,下調味汁 (酒和水按個人口味調較),必要浸過鮑魚
6) 放入雪櫃浸過夜便可 

溫馨提示:**我用李x記醉汁,覺得佢較鹹,所以加左少少水調味
**酒的份量無準則,按自己口味調就ok,但要先下酒,試味後再下水,否則如果酒的份量多,再下水會太淡了。



 


2013年5月1日星期三

士多啤梨忌廉蛋糕








o岩o岩過左o個個星期日,全家齊人同Owen + 姨甥女珊珊補祝生日喇。 本來應承佢由我煮比佢食,但係我左膊頭肩周炎,舉高都唔得,所以無煮,只可以整個蛋糕比佢,女仔多數喜歡士多啤梨,就整左呢個較簡單o既Cream Cake比佢。

蓋念來自James Martin Workshop o既十分鐘蛋糕,立即學以至用,改一下就成為自己的版本啦。  呢個士多啤梨圍邊我都係第一次,配白白o既忌廉真係好靚呀。 但係當然我無用到現成蛋糕(因為買唔到),所以焗左個綿花蛋糕。

用士多啤梨裝飾後覺得有d單調,就整左一片圓型朱古力花放o係上面,加埋上次用剩o既金鉑,睇落即刻唔同晒呀。

珊珊好鐘意呢個蛋糕,仲係咁影相要立即放上FB喎。


蛋糕組合:

綿花蛋糕兩片,底面各一片(做8吋,脫模後用7吋模壓下成為7吋,確保無虛位)
剩下的蛋糕邊我都放埋落去,一來好軟熟唔好浪費,二來忌廉層唔會咁厚,無咁漏。

忌廉 - 淡忌廉400g,3湯匙糖(好隨口味加減),雲呢拿香油半茶匙,打至企身



士多啤梨適量。



綿花蛋糕製作圖 - 呢個蛋糕口感好濕潤,好軟熟,又唔難整,做cream cake一流。



朱古力片製作圖 - 用不調溫朱古力隔水坐溶,放入唧袋(剪小孔,不可過大),再隨意劃在預先劃了圓型的牛油紙上。 然後置於室溫待凝結,之後小心撕去牛油紙就得架喇。