2012年10月29日星期一

蠔油枝竹鯇魚腩




老公超鐘意呢個餸, 每次一話整佢就拍晒手掌,因為魚腩卜卜脆,d枝竹又送得飯,確係好得人鐘意o既,不過功夫都幾多,所以我都唔係成日整架。


食譜:

鯇魚腩一個,切條(老闆代辦),洗淨抹乾 用醃料醃兩小時
急凍濕枝竹8片 (凍肉店有售, 唔好買錯腐竹呀) ,用水煮10分鐘,撈起待用,如喜歡"淋"d,可按自己喜好煮多一會
醃料:老抽1/2茶匙 / 生抽2湯匙 / 糖1.5 / 薑汁酒1湯匙
汁芡:蠔油 / 生抽 / 糖 / 雞湯適量 /  生粉水適量

做法:
1)魚醃好取出,用紙索去醃料,加入1湯匙生粉撈勻。
2)用中火炸熟魚條,撈起用蒸架擎油,待翻炸
3)用另外一個鑊,倒入芡汁和枝竹,煮至淋,加生粉水埋芡,上碟備用
4)燒熱剛才炸魚的油(至滾),魚條回鑊翻炸至金黃脆身,襯熱排放再枝竹芡上便可上菜。

貼士
1) 好似我咁用易潔小煲咋野可以用小d油
2) 魚先炸一次再煮汁,因為第二次翻炸係好快,咁做魚都會熱辣辣,脆口而d汁仲係熱o既。

2012年10月27日星期六

整色整水 - 口水雞




 



 兩個星期同老公去民聲食過呢個口水雞好喜歡,尤其喜歡佢個汁料。而家我同老公出去食飯大家食到好味嘅野,都會研究吓啲汁料內有乜(有D走火入魔),返屋企無耐就會心痕痕想試整,呢個汁料整出嚟都幾似樣㗎。 

重陽節正日媽媽預告會帶來半隻拜神白切
雞,一於試吓整口水雞,反正隻雞係現成貨,我只係負責整色整水,係超簡單任務, 經加工後,就成為呢個A貨, 屋企人都好鐘意呢個新食法呀

配料 - 皮蛋,芫茜,花生粒,辣椒粒,粉皮 (可隨意)
汁料 - 生抽 3湯匙,老抽1茶匙,醋2茶匙,糖4茶匙,辣椒油小許)酸甜度可自行調敎:)







2012年10月24日星期三

易如反掌的牛奶布丁(附經更正食譜)






已前我曾經舖過牛奶布丁o既食譜,其實係將Panna Cotta的食譜放入呢個小樽,但係上次我去Yvonne屋企前一日,再o係吉之島買左一樽食,食o下食o下,發覺完來係無忌廉味架。
我即係買左一盒北海渡牛奶,就齋用佢加少少糖,再加魚膠片,就整出左真真正正的牛奶布丁啦。  以前跟我過食譜整個布丁的朋友,可轉用呢個呀,味道清新d,需然係全脂奶,但係都無忌廉咁高脂。

約6小樽份量

材料:北海渡牛奶500ml

魚膠片 1 3/4片(每片約5g),通常如果當晚就食,我會用兩片。

砂糖50g 左右(或隨個人口味調教) 

做法:   

.將牛奶、糖加熱,不必沸騰,糖溶了就得, 試味,(唔夠甜可以o係這時加糖)

2.加入事先用冷水浸軟的魚膠片,攪拌至完全溶化。

3.倒進溶器,攤凍,雪至凝固。


Tips:  1)  緊記全過過程要用最細火,不可滾起。
        2) 想再香d可以加50ml淡忌廉,但奶的分量就要減50ml啦。

2012年10月16日星期二

滑蛋蒸肉蟹



出街食飯可以帶比我好多"煮意",前幾日去筲箕灣民聲食飯,喺餐牌見到呢道菜,因為一碟得一隻蟹唔夠食,所以當晚冇叫到,不過我知老公好想食。(你地都知我全家係蟹痴)。琴日去街市見都細隻肉蟹,只係56蚊斤,三隻賣74蚊咋,就試整比老公同Owen。
煮之前一路構思點先可以蒸蛋滑滑而
d蟹又夠熟呢,最後諗到呢個辦法,真係好Work,  咁整d蛋好滑,好香蟹味,d蟹又勁鮮甜,原汁原味難怪兩仔爺一路食一路問 -“點解好以咁好食o既 , 一路睇住佢地食得咁開心,我都覺得好滿足啊,我諗呢d就係我煮野食o既動力呀。

食譜:
肉蟹3隻(中型)
蛋汁: 蛋5隻 / 雞湯=蛋的1.5倍(份量已包括小量蒸蟹汁,記住先隔渣)
-蟹洗淨,斬件,排在深碟中,蒸十分鐘,離鑊,拿起蟹蓋,倒起蟹汁
-加入蛋汁,用錫紙封面,大火蒸8分鐘,放回蟹蓋,再蓋上蒸2分鐘蒸蛋熟透。

**哈哈,個玻璃兜已經唔細(所以要用5隻蛋先夠),但係仍都係oo岩好,連d蟹腳都犧牲晒,就連其中一個蟹蓋都放唔落,要另上呀。
**如份量多少,同容器o既質地都會影響製作時間(我用厚玻璃兜,無咁傳熱架),蒸的時間也應自行調節,唔係d蛋太老唔好食架。









2012年10月9日星期二

金蒜醬蒸龍蝦




我家住柴灣,經常買都平靚海鮮,尤其如果o6:45-7:00pm呢個臨收市o既時候去,耐唔耐會執到d平靚海鮮。 琴日就比我執到三隻開邊龍蝦身,每個蝦身都長有我隻手板咁長,都係賣100蚊,老公一見到就話要買。
用金銀蒜蒸,粉絲舖底就一定無失拖,今次主要係介紹金蒜醬。
 
金蒜醬:
蒜頭兩個,切粒,下一塘匙油燒熱,慢火鈔蒜粒至微黃,離鑊置碗中
1.5茶匙糖,2.5茶匙生抽,1/2茶匙生粉撈勻,就成為金蒜醬喇。

**不同牌子醬料鹹味不一, 請自行試味調節. 



呢個係我以前鄰居關太好多年前教我嘅,當時嘅Owenmama最叻只係煎紅衫魚,其他乜都唔識整。
每次蒸海鮮時落d金蒜醬,再加埋小許生蒜,要黎蒸蝦,蟹,象拔蚌,貴妃蚌,都好好味,總之同海線好夾架。
蒸熟再加豉油(糖加生抽),灑上蔥花,贊滾油,就成為美味o幾蒜蓉海鮮喇。



2012年10月5日星期五

雙層芝士蛋糕



 
 
 
 

上星期六係姑奶生日,佢同女女黎左我屋企慶生整左幾味小菜同佢至愛o既薑蔥炒蟹比佢食。   佢兩母女最喜歡食芝士蛋糕,睇勻晒d食譜,呢個最o岩佢地,因為姑奶鐘意原味,女女鐘意朱古力,兩總味都有齊,皆大歡喜。 雖然呢個蛋糕比教費時,因為要先焗好下層原味,雪過夜先整面層, 今次整第一次朱古力圍邊,仲學人玩轉印紙,初次整有d雞手鴨腳,但係都算合格啦。  如果塊圍邊整可以整得厚d就更好喇。 

食後報告:  老公同姑奶愛下層香濃原味,Owen 同表姐愛上層香甜朱古力味,而我,就最愛個脆脆餅底


食舖來自為食貓:


http://www.leisure-cat.com/frm_1193.htm




朱古力轉印圍邊做法:

將不用調溫朱古力隔水坐溶,再平撥在轉印紙上(事先量好圓週再裁剪,可用膠紙接駁),待開始凝固80%左右將轉印紙圍在餅邊,然後放入雪櫃待徹底凝固後取出,小心撕去轉印紙便可。



2012年10月3日星期三

咖哩炒蟹









前两晚老公返中,  2號晚先一家三口補做節,Owen又想食蟹,佢今次忽然要求我整咖哩蟹,做節就下佢啦,其實我都無乜信心加,所以今次用左罐裝咖哩汁,只係加糖調味,穩穩陣陣咁整出呢個似樣o既咖哩蟹喇。




今次買左兩隻大蟹,共兩斤重,個箝好大隻,啖啖肉,加埋個汁送飯真係超好味呀,加埋條燕星班尾(大大條,都,炒碟菜就係我地o既做節飯喇。

食譜:

肉蟹兩隻(我買左兩斤),切件,洗淨抹乾,撲上薄生粉,半煎炸至熟備用。

洋蔥一個切片,唐芹切段備用

椰子咖哩汁一罐,糖三茶匙,花奶半碗,蛋二隻打(小)打散備用

做法

-燒熱兩湯匙油,下洋蔥爆香,蟹回鑊兜炒

-下咖哩汁+糖,下唐芹,再下花奶兜勻至滾起

-下蛋汁,快收兜數下至蛋開始凝固即熄火, 便可上碟