2012年8月28日星期二

栗子雙生兒





 
 
過去的星期六/日,分別為大伯同家姐慶生,佢兩個都係栗子蛋糕迷,我就買左一大罐甜栗子蓉,分別做兩個蛋糕比佢地。

大伯向來腸胃唔多好,同埋星期六得四個人,所以我選左做個小卷蛋比佢,同時卷蛋可以用小d忌廉。   原來想唧得d栗子條靚一d都唔容易要好用力同埋會一路唧一路斷,不過味道又真係好好o既。

星期日一家齊晒共12人,要整個大蛋糕先夠,其實係換煲不換藥,材料完全一樣,只係形狀唔同,仲有就係家姐超愛栗子,三層內蛋糕上都舖滿栗子,佢好喜歡呀。

星期日整蛋糕加埋12人的飯菜,一早忙到夜晚,但係真係過足癮呀。


o個晚成檯都係餸, 但係食到一半,老公去添湯先發現焗爐面仲有一大碟蝦醬炒通菜,拿拿林拎埋出黎,好菜咋,唔係就浪費晒啦。  抵老公話我大頭蝦架。







2012年8月23日星期四

芝士肉醬意粉





呢個係兩個星期前整o既,老公返中更,我同Owen都會整簡單晚餐或者係出街食就算,上次Owen忽然話想食肉醬意粉,我放工就去吉之島買料,因為只得兩個人,我無買到茄糕,因為只用小小費事浪費,只係用左茄汁同糖調味,不過都用左細半枝茄汁至夠。

做法好簡單:

燒熱油下洋蔥粒爆至半熟(1個,小的),下蕃茄粒(1個,中形),炒至出水份,下肉碎12兩(牛/豬/雞均可)炒至9成熟,下茄汁,糖調味。

(煮肉醬時,另一爐頭同時煮意粉)

將剛煮熟的意粉撈梢為瀝乾水粉,立即直接放入肉醬內(不要過冷河),讓意粉沾上肉汁便可上碟。 最後襯熱灑上芝士碎便可。

**煮肉醬時不可太乾,否則放意粉後會更乾。 
**意粉不要過熟,否則太淋不好吃。



加個煙肉炒露荀,呢個係就我同Owen的晚餐喇。  


 

2012年8月20日星期一

木糠布丁 + 囍宴





除左New York cheese cake, 另一個最受朋友同同事們歡迎o既就係木糠布丁了。  之前部門同事補請我去囍宴食生日飯,我就整左呢個黎做回禮喇。
佢地個個都好鐘意,仲有兩個同事問我拎食譜,佢地都想自己o係屋企試整下。

做呢個甜品我每次整都係用麥維他,因為我試過一次用瑪莉柄餅,但我覺得口味太淡,同質感太鬆散,用麥維他味道會豐富d(純屬個人觀點),所以之後我每次都係用麥維他整,雖然唔正宗,但大家對我呢個版本都好受落呀。 

講返餐生日飯,囍宴o係太古城其實開左好耐,但係呢次都係第一次試,d菜式好味之外,難得賣相同Menu張相係幾乎一模一樣,真係色,香,味俱全,加上價錢真係好合理,唔怪得門口成日都有大班人等位。 我得閒一定會帶老公Owen去試下,佢地實會鐘意。






2012年8月19日星期日

Super Easy - 蝦醬通菜





夏天最當造嘅通菜,用蝦醬或椒絲腐乳炒都好惹味,又好送飯,有時得我一個人食飯,就咁炒碟通菜加半碗飯又可以係一餐,既好清腸胃又好味。

想炒出好味的蝦醬通菜好簡單, 只要起鑊將薑絲,蒜粒炒一會,下蝦醬兩茶匙爆香,下通菜(1斤),雞粉一茶匙,花雕小許(菜會出水,不要下太多),炒至菜剛熟,再用小許生粉水令汁料稍稍變杰,便可上碟。 (下小許辣椒絲更惹味) 

2012年8月16日星期四

Owen暑期工@初體驗

上星期,Owen一連七日去左親戚再旺角開的水草店做暑期工,工時由每日11-9, 做足十個鐘,而且生意好好,日日都無停手。

每日佢早想要同d姨姨一齊將d蝦仔入袋比人選購,然後在袋上寫價錢,跟住招呼客人,撈魚仔,收錢........總之乜都要幫手,就連收舖拉閘佢都有幫手。

經過呢幾日佢開始知到搵食唔係佢想像中咁容易,要付出好多先有糧出。  我初時都擔心佢返兩日就話頂唔順,但係佢又頂到喎。 見佢頭兩日放工返黎,札袋札到兩隻手指都紅腫左,個心都好赤,不過我地兩個都無開口問佢,淨係吼佢訓左我地先至講。    始終男仔係要捱下先得架。

星期六我地去左突擊談訪佢同接佢晚飯,見到佢做野o既實際情況, 真係好忙,奇嫂同d姨姨對佢都非常nice, 重猛咁讚佢幫得手,又捱得喎。 我地兩個聽到都老懷安慰。

星期日係佢last day + pay day, 佢一放工返黎,就將幾份錢放o係檯面,話出糧比我(20%),公公,婆婆(20%)同舅父(10%)喎,之前佢講過,我仲以為佢齋講,完來係真,雖然得好少錢,但係我地都好心甜呀。

聽日係OWEN最後一日返工,多謝奇嫂同各為姨姨同哥哥對佢嘅教導同容忍,令呢個特訓順利完成:) 
 
比佢發現到我突擊佢添>-<






 
Owen 出品同專業姨姨出品,一眼就分得出,姨姨o個d脹卜卜,佢紮o個d就............,hehe.....


 
9點,夠鐘收舖,準備收返d魚仔,放返落魚缸


 
呢d魚仔同水草,Owen都有幫手紮架。  要分類收返。
 



拉閘都係佢幫手,佢覺得好好玩咁呀。
















呢d就係Owen 第一次比我地o既"家用" 喇。




2012年8月14日星期二

Owen的大碗餐

 Owen 終於完成佢o既暑假特訓,呢7晚,晚都係自己食大碗飯,或許係食壽司,或外賣, 不過睇黎佢最enjoy d大碗飯,其中牛肉飯仲要encore添,不過我雖然食材一樣,我用左唔同醬汁去做,咁就唔會咁悶喇。 不過每日做足10個鐘,返到屋企都好肚餓同好攰,我諗啦就算淨比白飯佢都覺得好味架。  




 呢個係最後一晚Owen要求encore的牛肉飯,今次用左現成日式燒肉汁,仲加左隻糖心水煮蛋,Owen話呢碗最好味喎





 
中間隔左餐烏冬,本來係雲吞+丸丸,但係懵豬媽咪買雲吞,比左錢唔記得拎雲吞,所以就用午餐肉代替喇。











吉野牛肉飯,用左親子飯o既汁料,只係加左豉油,同減左d糖o既比例,因為呢個汁係唔會好似親子飯咁甜架。











2012年8月10日星期五

Owen 的大碗飯 - 親子丼






呢幾日我地安排咗OWEN去親戚的水草店做7日暑期工,等佢體驗現實,每日11至9,都好辛苦,呢兩晚為佢整咗簡單嘅大碗飯,等佢放工返嚟食, 等佢又啲心理補償。 本來想買枝現成親子飯汁黎做,就更簡單,點知賣晒,唯有自己較啦,不過都好簡單o既。

佢返到黎都差唔多10點先有晚飯食,話好佢係負責將d水草入袋同買按客人order撈魚仔,因為旺角人流多,除左食飯時間係無得休息,都幾攰,一口氣食左兩大碗飯添。    而家的90後都係衣來申手,飯來張口,希望佢經過呢7日勞動,會令佢真係知到大人搵錢一d都唔容易,要收穫要先付出,要珍惜而家所擁有o既野。


材料: 

二人份量:

-去皮雞睥肉兩塊,切件,用1/2茶匙鹽醃半小時備用
-洋蔥一個,切粗絲
-蛋2隻 (打勻備用)

汁料:

-味淋((日式料理酒)2湯匙,水1湯匙,生抽2湯匙,糖1.5-2茶匙


1) 下油燒熱,轉細火下洋蔥爆一會,下雞肉炒至9成熟
2)下汁料煮至滾起,確保雞肉熟透,下蛋液,輕輕炒至蛋剛熟便成。



2012年8月4日星期六

Happy Happy Birthday


 


多謝各位的祝福,仲有各好同事,好隣居,雀友+darling同老公送的各式生日餅,我過了一個super sweet 的生日,I really luv u all !!!! Muah xxxxxx

今年的生日喺泰國芭堤雅渡過,好開心,今年老公同OWEN送咗個泰式香蕉    比我做生一蛋糕,但係返到酒店發現佢哋派人放咗個蛋糕同蠟燭喺度,真係好貼心啊! 本來已經食都好飽,結果個蛋糕都要流返第二日先食度。

好多年無去過芭堤雅喇,今次揀咗呢間 Centara Grand Mirage,因為泳池超大,成個水上樂園咁,啱哂老公同OWEN玩餐飽。  原來佢仲學埋Club Med 咁,每日有三,四樣免費集體活動比住客,好似水中 Aerobic, 水中手球,排球,攀石,沙灘足球等等,成班住客玩埋一齊,好快又一日。


View from our room - Soooooo nice







2012年8月3日星期五

蘋果提子Muffin (食譜)








你地睇,雖然只係用o左一個蘋果,但係8個鬆餅,個個都超多蘋果架,(當然有我全家o"飛佛" - 提子啦),我仲落od肉桂粉黎炒蘋果,真係超香呀!!   剛焗起食o左一個,外面脆,裡面鬆,真係好好味呀!!
整埋餅,上埋blog 都係10點半咋,好彩老公仲有一個鐘就返喇,haha.....

材料 - 8(2.5吋紙模)份量:
餡:
大青蘋果 1個切小粒      1.5湯匙    檸檬汁1湯匙   玉桂粉 小許 (可省掉)
-蘋果粒加檸汁和糖炒至乾水,加小許玉桂粉拌勻
-提子乾用小許水浸軟,再瀝乾水份備用
鬆餅:
牛油 75g     75g    1.5    牛奶75ml    泡打粉 1/2茶匙  蘇打粉1/2茶匙
鹽小許        低粉150g
-牛油室溫放軟加糖打至順滑, 加入蛋汁打勻
-加入牛奶,小許鹽
-加入已篩粉類拌勻,最後加入蘋果粒及提子
-用唧袋唧進模內,180度焗約15分鐘至金黃。