2012年4月30日星期一

滷水三寶









呢個菜式係上兩個星期大姑奶黎食飯時整o既。 佢同女女最愛吮腳趾 (我老公都係),之前佢黎親我都會整一大煲沙薑雞腳過佢食,今次就轉整滷水雞腳,等佢地無咁悶。 加埋冰格o既鴨舌,再煲多幾隻蛋,就成為滷水三寶喇。


個汁係我老媽子o既老配方。好簡單,只係用老抽,生抽,冰糖同幾粒八角就攪掂(老抽份量較多,個汁要深色d先靚。 我無特別量份量,先開左個汁,之後一路用老抽,生抽同冰糖調至o岩味為止,用完o既汁可以入起放入冰箱再用。

呢味菜本來好簡單,但係三樣食材烹煮o既時間唔同,要分三次整。

-蛋煮熟後要浸1-2日,
-鴨舌出水,過冷河再炆大半個鐘,
-雞腳就要先煮熟,過冷河再炆約兩個鐘至淋(時間按雞腳大小調節)

睇佢地食都 "Lam Lam 脷" 我就最開心喇。


*******************************************


各位朋友,本人已於 Facebook 開了 Fan page, 請登入以下網址比個 LIKE 我啦。
以後大家除左可以上Yahoo blog,仲可o係 Facebook同我溝通呀!

2012年4月20日星期五

挑戰3D足球蛋糕 - For Owen's Birthday







Owen今日16歲生日,大個仔,唔會再喜歡卡通蛋糕。 特別為佢做左呢個3D足球蛋糕,我諗會o岩佢。    我都係第一次做3D組合蛋糕,雖然唔係好perfect, 但係同我構思好吻合,仔仔好鐘意呀。 


今日Owen會請10位同學返屋企Party, 而我同老公就要出街食飯避席,到10點先返去同佢地切蛋糕。  今年係第一年正日生日佢唔同我地慶祝,證明佢真係大個仔,雖然有d失落,不過都要習慣喇。


一早開始構思造型, 星期三晚一口氣整定綠茶芝士蛋糕同半球朱古力慕絲蛋糕, 咁星期四晚同Owen食完生日飯返屋企就可以組合喇。

本來想用海綿蛋糕草地底base,因為我諗會似d,但膽心足球蛋糕太重承受唔到,最後用左綠茶芝士做底。買左綠色色膏用製作"草地"忌廉,啡色忌廉就係用朱古力忌廉做,製作過程比相像順利,個幾鐘就整好。(特別鳴謝老公幫我洗左幾輪碗,呢個蛋糕佢話好大功勞)
足球係朱古力慕絲蛋糕,草地層係綠茶芝士蛋糕(兩個都係海綿蛋糕底)。












 

雲石芝士蛋糕 - Happy B'day to Owen & Shan Shan





星期六一家人為Owen 同姨甥女珊珊慶祝舊曆生日,為佢地整左呢個雲石芝士蛋糕(海綿蛋糕底),全家人都可鐘意,希望佢地兩個開開心心,快快樂樂。
佢兩個都係婆婆一手湊大,眨眼間已經大個仔同大個女喇,佢兩個bb o個時都超可愛呀!

2012年4月19日星期四

芝士龍蝦伊麵





呢個係上兩個星期整架,事源我同老公去行街市,碰o岩見到有隻超大,又平,靚,正o既花龍蝦,老闆話佢o岩o岩 "訓覺",只係賣$180,我同老公即刻立左佢番屋企。 

一個鐘頭後,佢就變成上面呢碟芝士龍蝦伊麵喇。呢個可能唔係正宗做法,但係好味就得啦。


做法:

1) 龍蝦洗淨,去腮,切成大件,瀝乾水份備用

2) 用毛巾吸去龍蝦件上水分,撲小許生粉,下鑊半煎炸至熟,
   離鑊瀝油

3) 燒熱鑊,下一杯半上湯燒熱(份量按壟蝦多少調節), 
   轉細火,下2湯匙花奶,再下三片芝士,慢推至芝士徹底
   溶化,試味 (可按口味下小量鹽調味),最後再用適量生粉
   水埋薄芡,龍蝦回鑊兜勻,便可上碟。

**因芝士片本身帶小許鹹味,所以最好等芝士溶化後先試味,否則怕會較鹹。
你地睇下佢幾大隻,幾靚,仲長過塊砧板呀,$180 真係超級超值啊. 


香噴噴菠籮批





阿B終於考完試喇,即刻就要整番樣野止手痕先。
呢個係6”o既菠蘿撻,係跟何太o既食譜做既(sorry, 之前記錯o左韋太,佢地兩個都係高手),做好撻皮後都考慮梗做焗批定係吉士凍批,(因為見到做熱批都要落幾多牛油,,又唔知好唔好味),最後諗過凍批經常整,但熱o既就未試過,就試o下啦。
應各位要求,以下就係何家私房菜的連結,希望何太唔介意我舖出啦(當然佢整得靚好多):
結論:呢個批一d都唔難整,口感幾特別,撻皮好脆,d餡有d似杏仁牛油蛋糕 (因為有杏仁粉,同菠蘿好配合。 我相信亦可以配其他水果,例如:蘋果同罐頭蜜桃,應該都會好夾味架。


 http://kennymelody.mysinablog.com/index.php?op=ViewArticle&articleId=532027

材料
撻皮 (18cm)
牛油                30g
 
植物牛油        30g
糖霜                30g 
低筋麵粉        125g
雞蛋                1只
果占                小許 

餡料
牛油                50g
 
沙糖                50g 低筋麵粉        25g
雞蛋                1只
杏仁粉            30g 
菠籮                適量 

 撻皮做法1. 牛油及植物放軟,  加糖霜打至奶白色
2. 遂小放入雞蛋搞勻
3. 篩入低粉搞成粉團, 雪20分鐘4. 將已雪之粉團look 成撻皮 (用食物袋/保鮮紙包住去look, 免痴底), 然後按入撻模
5. 再放入雪櫃20分鐘, 然後係撻皮塗上薄薄一層果占 (可令撻皮脆d)


餡料做法1. 牛油加沙糖打至奶白色
2. 遂小放入雞蛋搞勻
3. 篩入低粉, 加入杏仁粉搞成糊狀


合併做法1. 將餡料倒入撻皮內
2. 將菠籮排係餡料上, 然後提起焗盆用輕力在枱上楑幾下,令菠籮痴實餡料
3. 放入已預熱210度焗爐, 焗20-25分鐘即可 (要小心睇火)
4. 出爐後脫模, 灑上防潮糖霜裝飾即可

2012年4月17日星期二

肉末粉絲 (螞蟻上樹)


呢期食得太多肥膩菜式,呢餐想清淡啲。 試做左呢個螞蟻上樹。
想當年我同老公拍拖時,好鐘意去銅鑼灣 St. Paul  對面嘅鄉村飯店食飯,每次都會叫呢兩個餸 :  1)肉末粉絲 (又名螞蟻上樹), 2)紅燒肋骨,  真係食極都唔厭。  不過呢間飯店都執咗好耐,無得再食喇。

今次我做左個簡易版懷緬一吓, 雖然唔係一模一樣(正版多啲椒粒同濕啲),但係一上檯,老公就講得出喺鄉村食過,都算合格了。 

做法:

1) 粉絲$5用冷水浸軟, 過熱水,再過冷河, 瀝乾水,剪碎備用。
(咁做可以防止粉絲炒嘅時後太吸汁。)

2) 洋蔥,紅蘿蔔切幼粒備用
3) 半肥瘦豬肉攪碎(用少許糖,生抽,油醃好備用)
4) 半碗水(雞湯),2茶匙蠔油,2茶匙生抽,1.5茶匙老抽,1.5茶匙糖拌勻備用(可按自己口味調較)
5) 燒熱易潔鑊,下2湯匙油,爆香洋蔥, 下肉碎炒至8成熟,下紅蘿蔔粒兜炒一會
6) 下粉絲兜炒,再下汁料炒至全部材料徹底混合(試味+最後調味),便可上碟。

呢個餸送反飯又得,當炒麵淨食都得,真係唔錯㗎。

2012年4月13日星期五

簡易蜜糖烤雞


呢個烤雞真係好味有易整架。 之前愛想左蒜香焗雞,呢次想轉下口味。  媽媽送左枝家鄉自釀蜜糖比我,就用黎整蜜糖烤雞。
做法super簡單,老公同仔仔都話呢個做法比蒜香焗雞更好味喎。 我仲加埋我同老公最愛o既南瓜一齊焗,好好味呀。

做法:

-春雞一隻 (900g),在雞背剪開 (從脊骨兩側下剪,去掉脊骨), 然後擘開,壓平

-用大半匙鹽醃最少4-5小時

-臨入爐之前在雞皮上抹上小許老抽(加色用)

-放入已預230度的焗爐焗35-40分鐘(時間按雞大小調節), 途中塗上蜜糖2次(約在25 分開始,太早掃雞會易焦)




用較剪將整條脊骨起掉,然後將雞擘開,壓平:





已抹上老抽,準備入爐 (南瓜略炒,焗約25分鐘就夠)。

 
焗好喇:


2012年4月10日星期二

雲石紋戚風蛋糕 - 如何劃花 demo video






戚風蛋糕確係人食人愛,口感軟綿綿,又好味。 我上星期一口氣做o左兩個黎招呼親友。 個個食完都問d朱古力花點整,話好靚喎。  其實有d網友都曾經問過我呢個問題,我用文字解答過,咁o岩o個老公得閒,就叫佢幫我拍低佢同大家分享下。 想做出靚靚雲石紋戚風蛋糕並不困難,睇下呢個示範就知點做。 今次我只示範了兩層隔花,如做三層隔花的話,雲石效果更美,朱古力味更濃

紐紋戚風:  普通7吋原味戚風蛋糕食譜,用深碗將兩大湯匙無糖可可粉加適量熱水拌成朱古力糊,把1/4蛋糕麵糊加進,變成朱古力蛋糕麵糊,再跟demo video 做法就得啦。



如何劃花 demo video :  Demo Video






**之前仲有朋友問紐紋芝士蛋糕點劃花,其實方法同呢個大同小異,只要將朱古力部份用匙羹一點點的放再蛋糕漿上,用小刀/竹簽在面層撩出花紋就得(不用撩到底)。

2012年4月3日星期二

溏心滷水蛋




新年去左日本玩,其中一餐食左一隻好好味o既溏心滷水蛋,一路都好掛住,原來自己動手一d都唔難,只要時間掌握得好就零失敗,你地都試下啦。今年復活節唔食復活蛋,改為食溏心滷水蛋都唔錯呀。

做法:

蛋(室溫),隨冷水煲至水滾(水要過蛋),


水滾後開始計5分鐘 (其間用鑊剷輕力移動雞蛋,不要蓋煲蓋),之後立即撈起過冷河。 


完全冷卻後去蛋殼放入滷水中浸1-2天就得喇。


*我用o既係大蛋,時間應按蛋大/小調節一下。

(我今次好懶,只係用現成滷汁咋,切記滷汁要較甜一點,太鹹唔好味架)

我都係第一次整就成功,你都試下整啦。