2011年12月24日星期六

平安夜自煮法國菜 - 好食又好玩:)





平安夜本計劃好一家三口去食壽司,跟住就去睇燈飾應下節,點知22號Owen先同我地講佢平安夜要出街,兩公婆想出去食法國菜有訂唔到位,於是嬲嬲地決定自己整餐冒牌法國菜食下。 23號放早去左吉之島買食材,碰o岩佢聖誕節大減價,買左鵝肝同安格斯牛柳條,煙三文同其他材料,至於波士頓龍蝦就係經過街市見到又平又靚臨時加o既。 

當日下晝set好張檯,老公出黎見到都話都有啲餐廳feel呀,仲話要開埋靚紅酒添。 呢次第一次做雙重角色,大廚同顧客都係我地,每食完一道菜就一齊入廚房準備下一道,原來又真係幾好玩喎,好過o係餐廳坐o係度等食呀(全因我係賤骨頭,哈)。 老公久經訓練,二廚角色做得好稱職,抵讚。   平安夜出去食閑閑地一人成千蚊,而家只係唔駛三份一價錢,  兩公婆就有得食又有得玩,呢個平安夜超正呀。

今次一共有六道菜, 全部都係以簡單煮法構思,希望菜與菜中間唔駛隔太長時間:


前菜 



 -煙三文魚魚子沙律











-法式香煎鵝肝 。肉桂蘋果粒

 -南瓜忌廉湯
 主菜

-蒸龍蝦。葡國忌廉汁  (諗唔到配乜汁,就地取材,葡汁加淡忌廉加少許水煮成,唔錯呀)
 -安格斯牛柳。牛油新薯。雜菜
 甜品



-Chocolate Brownies . Vanila Ice-cream
 

老公都要出手呀。

2011年12月11日星期日

羊腩煲 (附做法)


 天氣咁凍,最好莫過於食個暖身羊腩煲呀。 一大煲滾下滾下,就算唔食羊肉,剩係食配料(冬菇,冬筍,馬蹄,枝竹,生菜)同整個羊汁出前一丁都以經好滿足啦。

今次無我用開o既順發孖記炆羊醬賣,只好用其他牌子,但係真麻麻地, 之前用開o個隻剩係加水同少少生抽,冰糖就已經好好味,而且顏色淺好多,靚仔好多,但係而家買到呢隻就又深色,有得個鹹字(味道好似柱侯醬),於是我只用左少少,另外再加左d磨豉醬同蠔油,生抽同糖調味,先有返d以前o既感覺。

其實羊腩煲並唔難整,只係炆o既時間長d,雖然買料錢都唔平,自己炆比出面食o個d料靚好多,仲大煲好多,一大檯人都夠食呀。


做法:



1) bb羊腩2磅,洗淨,擎乾備用,  


2) 起鑊爆香薑,蒜,下羊腩爆至外面轉色。


 3)把羊腩移至深煲內(薑蒜棄掉),加水(剛蓋過才料),順發孖記炆羊醬(雜貨店有售,我用),冰糖1小粒,同時加入已浸泡的冬菇,馬蹄,冬筍)中科煲至滾起, 之後專細火炆45分鐘,熄火焗15分鐘,止後再重覆炆焗一次,檢查羊肉是否已夠軟,否則要再做炆焗工序,不過第三次之後每次炆15分鐘好了,否則怕會炆得過火。

4)炆好後作最後調味,就可以上檯,或隨喜轉至電鍋中,一邊食一涮枝竹,菜類同埋出前一叮, 100 個正呀!