2010年2月27日星期六

至愛 - 焦糖墩蛋





云云甜品中,我屋企人至愛都係法式焦糖燉蛋 ,呢個甜品好似有魔法咁,令你耐唔耐你就會掛住佢。 已經好耐無整過,今日又忽然好想整,好彩雪櫃又有齊材料,唔駛20分鐘就整好(未計入爐o既時間)。   o岩o岩食埋添,好好味呀,老公仲食左兩個添呀,(正式係兩個半,因為我怕肥,只食左半個)。
其實呢個甜品超容易咋,襯聽日係中國情人節,試o下整比屋企人食丫。
想試o既話,以下係食譜,不過食譜話淨係用蛋黃,但係我會用全蛋,如果唔係焗極中間都係水流流架。
http://www.rthk.org.hk/elearning/dessert/cake_cremebrulee.htm
預祝大家聽日有個浪漫,甜蜜o既中國情人節呀!

2010年2月14日星期日

步步高陞 - 蘿蔔糕


  • 今日係大年初一,祝大家心想事成,事事順利,身體健康,笑口常開,步步高陞。今年公司好好,年廿九(星期五) 下午送我地半日假期,呢半日好好用,我同老公先去左花盃食飯,再去左維圓買蘭花,今年買左又平又靚o既滿天紅,9"槍"都係賣$500 (講價後),之前每年都買開,但係無咁多"槍"數都要過六百幾蚊,執到平野,真係好開心。




 跟住就返屋企整蘿蔔糕,我從未整過,不過最近o係圖書館借左本 樑許安璞 o既 Cook Book,裡面有個煎蘿蔔糕o既食譜好吸引,又唔難整,就跟住試o下,不過安我只整左半個份量,都有一大底9吋糕,仲好樣又好味添,我諗以後得閒都會再整 黎食。  不過礙於版權,食譜不便公開,不過呢本書o係大型書店有得買,再唔係可以好似我咁,上網去圖書館網頁查o下邊間有,如果比人借晒,都仲好以預訂 架。

2010年2月7日星期日

滷水雙併 (食譜)







老公每次食車仔麵,都會叫雞翼尖,但係每份得6隻,叫兩份都係到喉唔到肺,前日買左兩磅,$20,有幾十隻,加埋我最鐘意食o既鴨舌(不過呢個就貴d,30幾蚊得廿幾條),一桌9人,個個都夠晒喉。

滷汁只用左: 老抽,生抽,冰醣,八角兩粒,玫瑰露,同水

**兩樣材料都要先出水先滷

**兩樣熟o既時間唔同,要分開滷。

**鴨舌要o係舌中間最厚的位置刺穿,如果唔係滷完可能會有d有雪味o既水o係裡面。