2010年7月28日星期三

戚風蛋糕



呢個係我搬左屋之後第一個整o既蛋糕;

自從搬屋時掉左個舊磅,好耐唔記得買,想整都無得整,上星期終於起心肝係Apita買左個磅,星期日就開工整左個最簡單o既戚風蛋糕,比d鄰居做下午茶 (本來想整紐紋,但係屋企材料箱連可可粉都無) 

今次仲膽粗粗第一次徒手脫模,成功左呀,初初個蛋糕比我到變晒形,不過好彩唔駛一陣佢就回彈成原狀喇。 呢個脫模方法比我以前用刀脫模靚好多呀,下次會繼續用。

2010年7月27日星期二

雜錦蠔仔瓜粒泡飯





雜錦蠔仔瓜粒泡飯 -
好耐無上blog, 因為呢排公司分派左多好多工作比我,放工返屋企已經無晒電,加上Yahoo  blog 成日有問題,平時放工想睇o下大家有乜新作都搵唔到,都無乜心機上。  今日終於見佢正常返,等我都"的起心肝再上Blog.

之前Owen去左上海世博遊學團,老公返中更,一個人簡簡單單,整左個冬瓜粒泡飯,用o既都係前一晚煮冬瓜脯多出黎o既材料同冷飯,只係買左D蠔仔同一合清雞湯,好味,簡單又唔浪費
做法同雞湯廣告教o既一樣,全部材料滾10分鐘(蠔仔除外,我先洗淨煮熟,較安全),最後落熟蠔仔同飯,煲滾就食得喇。 最緊要係老公無份食,終於可以放好多好多我至愛o既芫茜喇。
呢個泡飯非常簡單,但係異常咁好味。


********************************************************************


各位朋友,本人已於 Facebook 開了 Fan page, 請登入以下網址 add 我啦。
以後大家除左可以上Yahoo blog,仲可o Facebook同我溝通呀!

2010年7月11日星期日

消暑 - 冬瓜環






琴日家姐同姨甥女珊珊第一次o黎食飯,家姐阿姨們和媽咪一早過左o黎開檯,天氣實再好熱,都唔知整乜野餸好,去到街市見到冬瓜,就買佢  ,整個構思好耐菜式,但係未實踐過過o冬瓜脯”(未諗到改乜名)。,諗起屋企仲有罐頭包魚菇,再買左一塊雞扒同今華火腿,同埋即刻打比阿哥叫佢幫我浸定冬菇先(阿哥就住o係我樓上,好方便)  係咁多喇。
大熱天時用冬瓜做菜,有助消暑,一定會受歡迎。 果然大家都讚不絕口呀。
呢個菜式睇得又好味,最緊要係睇起o黎好酒樓菜,但係其實一d都唔難整,大家不防試o下:


做法:

1) 冬瓜 1斤半 - 去皮,用小刀開中空,要開大小許,否則餡會大少。
2) 雞扒1去皮,切粒,用小許鹽 +老抽調味 (老抽令顏色金黃)
3) 鮑魚菇一罐(我用o個隻有埋鮑魚汁)
4) 冬菇 – 3隻切粒(用糖+生抽撈勻蒸10分鐘備用)
5)芥蘭頭小許(可免,因為我買左芥蘭清炒,就地取材,整色整水)
5) 金華火腿小許切微粒 (裝飾用,本來想用夜香花,不過無得賣)
6) 芡汁 :清雞燙一小盒 + 蠔油調色 + 鮑魚菇汁 + 生粉水小許

做法:

-冬瓜置碟上整約30分鐘,倒去水份,在邊位灑火腿碎
-起鑊炒雞粒至熟,下冬菇及鮑魚菇兜炒
-用一部份芡汁加生粉水先把餡料埋芡,把全部材料置冬瓜圈內
-用餘下芡汁 + 生粉水再埋芡汁,淋在冬瓜邊緣,便可奉客喇。



**餡料可隨意配搭,可用雪耳,各種菇類,總之你想用乜就用乜喇。
唔好以為我一個人整晒咁多野,其實呢餐飯係好多係油阿嫂同家姐負責,
唔係我實o係廚房中暑呀。
阿嫂 - 粉絲蝦沙律 + 九層塔青口 +鹵水牛腱
家姐 - 豉椒抄蜆 + 佢最拿手o既炸排骨
樣樣都好好味。



********************************************************************
各位朋友,本人已於 Facebook 開了 Fan page, 請登入以下網址 add 我啦。
以後大家除左可以上Yahoo blog,仲可o Facebook同我溝通呀!