2009年12月29日星期二

冬至非常任務 (二 / 三) - with Shirley's link






今日終於無街去,可以上blog 了, 佢地就係我o係冬至當日o既第二同第三個任務喇,食完飯9點幾先開工,好彩兩樣野之前整過,11點幾大功告成喇。:   

 40chocolate brownies (我個爐唔夠大,要分兩次做先夠40件),係阿仔order o既,佢23號開X’mas Party,佢指定要我整呢個。 今次用左 Shirley o既食譜,做出黎比上次整的朱古力味更濃郁,同埋今次好小心,無焗到過熟,口感好濕潤,好正。  阿B 仲話好受歡迎。


最後就係為Joyce o既焦糖脆脆天使蛋糕,23號同佢慶生,同事知我要整野比阿BParty,  Joyce 想食天使蛋糕, 同事話去美心買就算,不過反正蛋糕由我去買,加上我覺得買好唔抵,就試o下整埋,最後真係整唔到先去買。

好彩公司放半日,我返到屋o係炆花膠o個時焗定蛋糕底,同埋整定焦糖脆脆,到焗第二盤Brownies就打定忌廉,出晒爐攤凍就開始抿忌廉,好快就攪掂。  

雖然好多工序,但係事前plan好左流程就會好做d喇。  一日內完成三樣任務,真係好有滿足感呀!

2009年12月27日星期日

冬至非常任務 (一) - 花膠扣鮑魚





舊年整左呢個菜,屋企人個個都好回味,今年一早買定左花膠,再黎多次,今年d花膠比舊年

大,足足浸左24個鐘,仲要再 炆左兩個幾鐘先夠"淋"(上年o個d浸過夜,再炆一個鐘就得喇),

 o個晚6點幾先整好,好彩o個晚我淨係負責呢個餸, 加上公司放半晝,如果唔係就實整唔切喇。

花膠發好再用鮑魚汁慢火炆浸約一個多小時(因為花膠半身無味,齋用鮑汁夠寡,我加左蠔油

/生抽/糖調味)。鮑魚都係買返阿一罐頭鮑,原觀浸再煲內煲一個鐘,就食得喇。 

呢個只係o個一o既第一個任務,食完晚飯仲有兩個任務要完成,而家又要出街,遲d再講比你地

知係乜任務啦。  

2009年12月15日星期二

大阪狂食之旅













琴晚剛從大阪翻黎,咁就玩左五日,快樂o既時間過得真係超快呀。
今次我地主要係觀光同狂食,真係夠晒喉呀。 

日本d野真係好貴(乜鬼都係),真係買唔樂手乜滯,但係食落個肚度就無所謂,所以我地決定要狂食日本野,尤其我地至愛o既魚生同牛肉。 今次食到最靚o既魚生同黑毛和牛 ,正到無得頂,真係不枉此行呀。  

除左食,今次我地會去返我地18年前渡蜜月去過o既兩個景點,就係大阪城公園 (o係我地頭兩晚住o Hotel the Lutheran 10分鐘就到,多謝大少奶介紹),仲有真係好靚o既京都清水寺,風景依舊係咁靚。

之後兩晚住梅田Hilton, o係地鐵上面,一落去就有行唔完o既地下街。

天氣比我地之前o係網上睇o既預測暖少少,不過有兩日就算著左羽絨都覺得好凍,可能因為天陰o既關係,不過都ok啦,無冷病到,都算叻架喇。
下面係其中一d靚景同美食同大家分享下:

















2009年12月7日星期一

涼浸浸 - 涼拌皮蛋肉鬆豆腐




呢個菜式我每次食台灣菜必點o既菜式,o係咁悶熱的天氣食,真係透心涼o架,而且真係簡單到不得了架。

我唔知做法正唔正宗,因為係按記憶中的口味黎整o既,不過都好似樣,關生同我老公都話好味
啊。

材料:

-蒸煮豆腐一件,蒸5分鐘,攤凍,倒去多餘水份,雪凍備用
-皮蛋一至兩隻(按個人喜好),切大粒,雪凍備用
-豬肉鬆 - 隨意 (記緊要買脆口的那種,否則欠應有的口感層次,我o係惠康買"林真 香")


自家創醬汁:

-蠔油2大湯匙,淡味生抽1茶匙,糖1湯匙,凍滾水一湯匙,麻油1茶匙。
-食的時後將皮蛋和肉鬆舖再豆腐上,再淋上醬汁便可。
**豆腐出頗多水,所以要臨食前再要徹底倒去水份,才把其他材料舖上。
**呢個汁係要帶少少偏甜。  但仍可隨意調較。

2009年11月29日星期日

18 週年 - Sunday Brunch @ 洲際酒店 Harbourside

今日係我同老公結婚18週年,好多謝佢對我d臭皮氣有無比能耐,我d朋友都話佢能人所不能,連我媽都話我執到喎。  我係 急驚風,你係  慢郎中,所以我成日都好容易爆炸,好彩你d忍功犀利咋。 我希望我自己黎緊 E.Q. 可以升呢,唔好成日都爆炸啦。 老公,我會加油架!

今日同老公去左洲際酒店Harbourside Sunday Brunch, 真係好多野食,仲可以加$100仲可以任飲Moet 香檳 (不過老公楂車,所以無飲) 海鮮種類好多唔再講,熱盤都好多,真係中,西,意,日乜都有。 較特別有我至愛的即煎鵝肝同即切風乾火腿,呢d係一般自助餐多好少有,鵝乾我食左3件呀,可以按要求要熟d或生少少,我覺得過熟唔好食。  Re-fill 好快,我有食o既野質素好高呀,唯一係d炸天富羅麻麻地,d粉太厚啦。 整體都係值o既,不過下次去唔會楂車,可以飲靚靚香檳呀。









2009年11月24日星期二

打孖上...天使 + 雲石芝士





上星期六慶祝雙楊父子” (即係兩對楊姓父子) 生日,所以應承左送上兩個蛋糕做賀禮。   原來放工後一次過整兩個蛋糕係好忙,已經構思左兩個較簡單的蛋糕,但係真係好忙,加上老公唔o係度,一個人要一路整,一路洗碗

-先做戚風(天使蛋糕底)
-襯焗緊戚風蛋糕,就整定焦糖脆脆,
-準備一個蛋糕的消化餅底,放入雪櫃雪硬
-戚風倒扣攤涼
-打甜忌廉,放入雪櫃備用
-開始製作雲石芝士餡
-打淡忌廉,再打芝士
-溶朱古力,預備魚膠漿…..

中間仲不停咁洗碗,真係手都跛,腳又軟,不知不覺整搞左幾個鐘,完成雲石芝士蛋糕都10點幾,先可以煮個即食麵。   好彩o個日天氣凍,個蛋糕11點就涼晒,可以抿忌廉, 到完成老公就開門返黎,從未試過見佢放工返黎咁興奮,因為最後o個輪碗唔駛我洗呀,好野。
下次如過一次過要整兩個蛋糕,其中一個一定會整紐約芝士,咁就一定無咁忙,時間亦易控制d。 或者放假先會打孖整啦。

好彩兩個蛋糕都好受歡迎,咁就"Lum" 返晒啦。

2009年11月20日星期五

美味排骨(豬扒)菜飯




星期日老公夜晚唔o係度食,剩返我同阿B, 佢成日都想食大家樂d排骨菜飯,橫掂無聊,等我試o下自己整。  菜飯經常煮,做法亦介紹過,係豬扒較小整,不過都唔難。

四件連骨豬扒(帶小許肥肉的較好食), 洗淨,抹乾,兩面用刀背啄鬆
(因為老闆切得好厚,啄完好大件,最後可切成8)

醃料:  
乾蔥碎2粒,生抽3湯匙,老抽3/4湯匙,糖2茶匙,鹽1/2 茶匙,五香粉3/4 茶匙(可免),生粉一茶匙,紹酒 1湯匙,水1湯匙,於深碗全部攪勻 ,放入豬扒拌勻,最後加入2湯匙油,醃最少4-5小時。

下鑊煎之前用小許生粉拌勻,再煎熟便可伴菜飯/白飯。

*因為試味發覺差小小鹹味,我在豬扒臨起鑊前在鑊上灑小許生抽,快手煎一會,關火,起鑊 ,估唔道咁反而令豬扒更香更惹味,顏色仲好d添,有時煮野就有呢d樂趣喇。

 **醃料視乎豬扒多少 / 個人口味而調較份量。

2009年10月2日星期五

一隻蛋做的蛋糕 - 附食譜

 

我整芝士凍餅時,多數都會用一片好薄好薄o既蛋糕片做底,平時阿B o係度,我會整一個分量,大d,因為佢會幫我消滅多餘的蛋糕,但係琴日佢唔o係度,唔想浪費,於是膽粗粗試o下用用半個份量o黎整,(一隻蛋),係用返我用開的食譜的1/2份量,結果又ok左。 Yeah!!  片完就剛剛好啦。  以後大家整蛋糕底都可以試o下。 


份量很簡單:

蛋 1隻(中等size)   糖  25g     低粉  25g     菜油 1/2湯匙   雲呢拿油小許

做法:

全蛋加糖打發至淡色完全起泡,篩進麵粉 (輕力 fold in)
加入菜油及雲呢拿油
180度焗約8-10分鐘至熟透
倒扣攤涼便可片去底面

貼士:
呢個蛋糕份量極少,打蛋過程必須掌握得好,如果蛋漿泡沫不足,便會失敗。

2009年9月19日星期六

很平凡,但好好味 - 榨菜蒸豬頸肉





唔好睇佢個樣咁普通,好似好古老咁,但其實唔知幾好味呀,仲好送得飯添。
以前媽媽整會用一舊舊o個d榨菜,不過而家好方便,
用切好晒的包裝o既“烏江榨菜”就得啦,仲無咁鹹添。
以前媽媽會用瘦肉,我而家就用左新鮮o既豬頸肉,其實係面珠登至真。
我貪佢好爽口,同榨菜好夾。
不過功夫多d,因為佢本身有耗多脂肪疵住,要用刀片左佢(好難片得晒,但係盡量將厚o個d脂肪片薄),如果唔係會好肥。

材料 + 做法:
烏江榨菜2(一般雜貨店有售)
-浸冷水一小時,用2茶匙生抽 / 一茶匙糖醃一小時
新鮮豬頸肉一片- 切絲(或用梅頭肉),size 同榨菜絲相約
-調味料: 老抽 / 生抽 / / / 油醃最少一小時
-將所有材料混合,蒸15分鐘
-打開鑊蓋,試味 (不用熄火)如不夠味可在此時加生抽和糖調味,再用小許生粉水埋薄芡, 攪勻調o岩味便可熄火上枱.

2009年9月7日星期一

霸王手撕雞 (食譜)



上星期六去左筲萁灣食出名魚蛋粉,食完就去最平又最多野野買o既筲箕灣街市賣餸, o個度有我覺得除左姑媽供應o個d之外,最靚o既新鮮黃油雞賣。 更好就係佢將d鮮雞斬件賣,鐘意邊part就買邊part.

最後買左兩隻王油雞脾,簡單地用花雕同幼鹽醃數小時,隔水蒸熟,再手撕成絲。 

以芽菜墊底 (先出水,擎乾,以小許油鹽炒一會,不能過久,否則大淋會失去爽口感覺),再舖上雞絲,再用油爆香大量蒜蓉青蔥粒同小去芫茜(不要爆大耐,要保持原色和水份),再以生抽和沙糖調味,再淋在雞肉上,就成了一味夏日好菜式了。   

呢個汁有d似泉章居o個隻霸王雞個汁料,所以就叫佢都霸王手撕雞啦。

2009年8月25日星期二

Classic Tiramisu





呢個係為同事Isa 做的birthday, 因為呢排天氣太熱喇,如果整凍餅真係驚未返都公司就溶晒,所以構思整呢個Classic Tiramisu, 有溶氣裝住,就唔怕會溶啦。
咁o岩新買左個橢圓形o既玻璃兜,真係大派用場,同事仲大讚咁樣簡結兼特別添。
佢地都係第一次食呢個變奏Classic 版o既Tiramisu, 大讚香滑濃郁呀,當然啦,食譜只用200g Mascapone cheese, 我就用足500g (因為買左大裝,所以唔好浪費),當然特別濃郁啦。 

2009年8月20日星期四

骨膠原 - 南乳炆豬手 (附食譜)



星期日請客,想整d新菜式,諗起以前老闆個菲菲整豬手好好味(其實佢煮乜都好食)自己就從來未整過,試o下都好喎。(佢個菲菲以經離開左香港喇),想食好食o既豬手就要自己動手。
呢個菜都唔難整,仲好好味,入口膠膠的,好似充滿骨膠原感呀!  
*都係o個句,雖然好味又有骨膠原,不過係高脂,高膽固醇,唔好成日食,一年都係一兩次好了。

做法都好簡單:

豬手一隻 (我再加左條五花腩)

- 斬件(要肉檔代辦,記得叫佢燒左d毛)

- 出水,過冷河 

- 燒熱油,放入數片薑片爆香,再放入南乳(料多,用了兩件) 用鑊剷攪至完全溶化,

-贊花雕(小半碗),炒香,再下豬手

-加水 (剛蓋過材料),生抽兩湯匙,老抽小許(純粹加色),冰糖

-大火燒至滾起,轉慢火炆淋,再試味,如不夠味好再加生抽和糖調味。
(我約用了2.5小時)

2009年8月10日星期一

貪得意 - 鹹蛋蒸肉山




鹹蛋蒸肉餅大家經常吃,但係好似我咁將佢整到好似一座山咁就少見d喇,係咪?

其實我又係o係到學人地o既做法咋。 之前去左大坑好出名o既民聲食晚飯,佢有味好出名o既鹹蛋蒸豬肉,就係將d免至 治豬肉堆到好似一座肉山咁蒸,阿B試過就成日都提住,成日叫我試整。  不過老實說,正版o個個雖然係好好味,好鬆化,蛋係真係好多好多肥肉,我地怕肥o既大人就唔係好喜歡啦 。 

自己係屋企整,會揀d無咁肥o既豬肉,咁會健康d,而且價錢仲平得多啦。不過,有一個問題,屋企o既火力同食店真係差太遠,呢個肉山蒸左差不多20分鐘先熟,而個鹹蛋黃都仲係未夠熟。 
下次都係咪鬼貪得意,整返肉餅吧喇。

2009年8月3日星期一

冒牌 Bangkok Grey Hound 魚露炸雞翼 (附食譜)




整左啦!整左啦!像真度有90%架。

簡單到震,不過用黎送飯就麻麻地,因為佢較乾身,用黎送冰凍檸茶/可樂,或者送啤酒就無得彈啦。


材料:

雞中翼15隻,洗淨,抹乾,一剪為二,醃好 (我星期六晚醃定,醃左過夜)
(醃料: 泰國魚露2.5湯匙 / 花雕酒3/4湯匙 / 老抽1茶匙 (純粹加D顏色)

-炸前一小時從雪櫃取出,讓雞翼回復失溫 (否則炸時油溫會急速下降,影響火力)

-以中火炸熟雞翼,擎去多餘油份 (我下午四點就炸定,夜晚咁臨食再炸一次,時間就容易控制得多啦)

-臨食前用以滾油以大火翻炸至金黃香脆,再灑想黑椒碎,便可上碟。(亦可按個人喜好灑上椒鹽佐食,風味更好。

溫馨建議:

*魚露份量可就個人口味加或減。 不過魚露唔同牌子,鹹味都可能有出入。

*我星期六只先用了2湯匙魚露,琴日中午用焗爐整左一隻試味,發覺唔係好夠味,所以加左半湯匙魚。 建議你地都好似我咁,先落少D份量魚露,試味後先按個人口味調整。 咁就唔會失手啦。

*老抽作用純粹係令雞翼係”整色整水”,唔喜歡可以刪去。

**一定要炸兩次,第一次係炸要炸熟D雞翼,第二次係將雞翼內多餘的油份和水份迫出黎,咁先會金黃香脆 (呢招係呀穌教o既)

2009年7月31日星期五

Special Thanks to my lovely colleagues








前日,我d同事同我慶生,請食飯同送蛋糕不在話下,中特登o係我 facebook download o左我幅相,整左呢張咁特別o既生日卡比我 。 呢張o係我有生以來收過最特別而有最愛的一張卡,所以一定要放上黎,等我時時都好以回味o下。
To:  Anita L, Anita C, Joyce, Isa, Eugene, Goretti, Michael, Gary, Ada, Eunice,
I love you all, you guys are wonderful !!


2009年7月30日星期四

Happy Birthday to me!!

今日係小女子生日,我d雀腳琴晚同我預祝,為左答謝佢地請食飯,同安排兩臺台灣牌聚會,我整左個紐約芝士蛋糕答謝佢地。點知去到先至原來阿姍都整左個差唔 多一樣口味的蛋糕, 佢o個個係藍莓味,佢好有heart, 連面頭d籃莓醬都係襯手整架。 真係好多謝佢。 最係決定兩個都切晒。 一次過切兩個蛋糕,都係第一次。





我好鐘意呢幅想呀,呢兩個蛋糕,一個深色,一個淺色,就好似我同老公d膚色一樣呀。 仲有我至愛的144個朋友 (我最愛的麻雀)。
To:  Sum, Ruby, Bonnie, 鼻鼻,Anita, 姍姍, Vicky: 
Thanks for the cake and party last night, I love you all very much and I wish our friendship could last forever!!

2009年7月27日星期一

泰,停不了 (2) - 青咖哩雞 (附食譜)




材料:
洋蔥 1個  泰國茄子 5粒 (一開四)

雞脾肉1大塊 (去皮切粗絲),用鹽,胡椒粉鹽30分鐘

青咖喱醬 一湯匙 (怕辣可以減少少)    糖 1.5湯匙   

雞湯 1- 1.5碗(視 附菜料多少) 椰漿 3/4 罐 (小罐)  魚露小許

金不換香葉小許


做法:

1) 先爆香洋蔥,下雞肉炒至轉色
2) 轉細火,下茄子,雞湯,青咖喱醬,煮5分鐘
3) 加椰漿,金不換葉,魚露,試味,細火煮10分鐘。
**青咖喱味道會有少少甜至似樣, 不過最緊要較都o岩自己口味。
**無雞湯的話,清水加雞粉都得。
**好預先做好,臨食再加熱便成。

2009年7月10日星期五

冬菇蒸滑雞









足足一個星期無上blog 喇,因為呢排公私兩忙。今日終於得閒d喇。
我最鐘意食雞,我老公話我可能前世係比雞啄死架,所以同雞有仇。 其實並唔係,全因係以前我姑媽係雞販,佢好照顧我地,所以我地經常都有鮮雞食,食開有感情嗟。
 
不過自從我附近街市無活雞賣,我都好少整蒸雞,因為蒸雞要新鮮雞先好食,上星期見冰鮮雞檔有黃油雞脾賣,好少見到冰鮮有黃油的,買左四隻,再加3隻翼,蒸左一大碟比屋企人食,個個都話好好食呀,拍得住鮮雞咁話呀。
 
我今次o係蒸之前將一茶匙金華火腿蓉撈埋d雞一齊,所以d雞充滿金華火腿的鹹香味,呢個確係唔錯的新嘗試呀。


2009年7月2日星期四

香煎琵琶豆腐 (食譜)




期日雀友到訪,呢個送雖然係多工夫d,要先蒸後再煎香兩面,不過外面香脆,裡面滑滑,個個都鐘意食,多d工夫又點話呢。

食譜來自”菊譜”,不過我整得厚d(因為無用匙羹做模),同埋最後步驟我無用炸的方法,只用易潔鑊以小許油煎香脆,咁會較為健康。 (紅色字係我同原食譜不同部分)



食譜來源: 菊譜

材料:鯪魚膠半斤,滑豆腐一塊,蛋一隻,芫茜兩棵(洗淨切碎)。

調味料:
[A]麵粉三湯匙,豆粉一湯匙,幼鹽、雞粉各半茶匙,糖1/3茶匙,麻油一茶匙,胡椒粉少許。
[B]白醋、茄汁、糖各兩湯匙,生抽、老抽、豆粉各一茶匙,水1/3碗[拌勻用小鍋煮滾成錦滷汁]。

[一]豆腐略沖水洗淨放大碗中,用飯勺搓爛,加入鯪魚膠、蛋、芫茜及調味料,順時針方向拌勻至材料完全混和成豆腐料醃半小時備用。

[二]預備十五隻湯匙,在湯匙內抹少許油,每隻湯匙搯滿豆腐料(將豆腐固定成琵琶形狀,若湯匙不夠,可分兩次蒸)放碟上,放蒸籠或隔水中火蒸八分鐘,用小匙將豆腐逐塊起出待涼。

[三]起鑊下油2/3碗煮滾,將豆腐逐塊放入(每次放入四至五塊,隨炸隨添,期間用長木筷子將豆腐慢慢翻動,每塊約炸十至十五秒),煎至兩面金黃便可

2009年6月21日星期日

給爸爸的牛腱花







琴日全家集齊我家預祝父親節,我同家姐負責煮晚飯,整o既都係家翻炒平日煮過o既菜式。唯一新嘗試係上面o既滷水牛 腱,中午用文火一個鐘左右(唔駛蚊大耐,呢個冷盤係要爽爽地先好食。,攤凍,再用汁浸住一齊雪凍(我諗咁會入味d),臨食就撈起切薄片,再淋小許滷汁就食 得。  夏天食呢d冷盤好o岩架。
我無買野送比爸爸同老公,就將牛腱砌成花型,當係花送比佢地o既父親節黎物啦。  好睇又好食,成家都好鐘意呀。
滷汁方面,非常簡單:
花椒,八角,生抽,老抽同冰糖 + 水 (要蓋過牛腱)
其實同炆牛腩的汁差不多,不過老抽的份量加左,因為牛腱要深色d先像樣。
牛腱處理:
先解凍,出水,再放入滾了的滷汁內文火炆一小時。攤凍,雪凍,臨食就撈起切薄片,再淋小許滷汁就食得。

2009年5月25日星期一

韓風炆牛腱 ( 牛蹇 )





靈感來自今期飲食男女,佢介紹尖沙咀有間好出名買炆牛展的韓國小店,佢約略提過牛"展"係用洋蔥,雪梨同蘋果黎炆, 我就即管試下,牛展先出水備用,再用適量的水加入生抽,小許老抽(調較顏色),將切片的洋蔥+兩個切件的雪梨放進(我無落蘋果,下次會試),加入冰糖同酒 煲滾,跟住放入牛展好似炆牛腩咁以炆40分鐘,焗30分鐘,再重覆兩次,至牛肉開始變軟,試味+調味,就放入紅蘿蔔再炆40分鐘就得啦。

煮完出黎,d汁好清,確係有d似韓國餐廳食o既紅燒牛肋骨的風味,仲有一朕淡淡的果甜味。

**如果你食過紅燒肋骨,就會知個味係少少偏甜,用佢黎做指標調味就無錯架啦。

**  炆的時間同牛展厚度/火力有關,可能會有d偏差,所以第二次炆+焗完就要測試再判斷要再炆幾耐。 煮野都要識執生架。

2009年5月12日星期二

開胃消滯 - 涼拌茄子 (





好奈無整呢個啦,悉逢母親節,加上呢排濕濕熱熱,整d涼拌菜,仲係酸酸甜甜,好開胃消滯呀。 果然呢個係當晚最受歡迎,開飯無耐就掃晒喇。

食譜: 

汁料:
生抽  2茶匙 /  檸檬汁 (1個) / 糖 2-3平湯匙(視乎個人口味調較) 
 + 麻油 小許/  蒜蓉 (兩粒)/ 芫茜(隨意,我鐘意勁多) 

把全部材料調勻備用(要試味,調至適合自己),仲有 我o係淋食前15分鐘先加入切碎的芫茜,因為呢個唔可以浸太耐架。

**我今次用的是家鄉蜜糖代替沙糖,係家鄉自製的,好稀o既,估唔到好香喎。
**最緊要試o岩自己口味
**今次無用醋,只用檸檬汁,都好好味。

製法:

-茄子兩條切條,放入鹽水中浸一會,可以令顏食保持得好d
-瀝乾水份,隔水蒸5分鐘 (唔好蒸太耐,唔係就會淋"pat pat",同會變晒啡黃色
-攤涼,雪凍
-汁同茄子分開雪凍,到上桌是上醬料就食得啦。

2009年5月6日星期三

芒果撈河 (附自家食譜)





前晚同老公去左許xx食甜品,食左一個芒果布甸,等緊野食黎就睇o下個餐牌,見到椰汁撈河,呢個甜品我想整好耐架啦。  就即買芒果,低二日即整。
網想食譜話要用奶,不過我唔鐘意,淨用 椰汁 + 水 + 糖 + 蒟蒻粉,製成品好潔白,仲清香添。 

好快就凝固啦,雪凍切成幼條狀(有d人將佢捲成腸粉狀,各適其式啦),再淋上只用芒果打的汁,就好好味啦。 不過一定要選熟透的茫過個汁先夠甜架。
    美中不足係唔知點解我已經攪得好勻同煮得夠熱,仍然有dd粉粒的口感,扣左少少分啦。 不過都已經好滿意架啦。  

自家食譜:

1) 蒟蒻粉 4湯匙  +    120g - 混合攪拌至蒟蒻粉溶解
2) 椰漿一小罐 165g  + 清水60g + 糖3湯匙(隨個人口味加減)
3) 1) +2) 混合,細火邊煮邊用木羹膠拌,至滾起便可熄火。
4) 3) 倒進已舖保鮮紙的鐵盤上,冷卻後冷藏至凝固便可切條,或捲成腸粉狀。


芒果醬
只須把熟透的芒果肉切粒用攪拌機打成汁雪凍便成。



2009年3月30日星期一

美味的焦糖脆脆戚風 (crunch cake)







本來對現時鬧得熱烘烘的美心天使蛋糕沒甚興趣,因為覺得好似好單調咁,但上星期三雀友生日聯歡友人送上呢個蛋糕,試過的確係正喎,蛋糕本身好清香,不太甜,配焦糖脆脆食簡直係一絕。唯一小缺點就係面頭d忌廉厚左少少。
琴日去左Sogo買銀包,跟住就戚起條根上去心甜烘焙o下有無粟膠賣,又有喎,o係網上跟左Shirley (sina)的食譜整 ,得左!!  真係好多謝佢無私的分享呀。
Shirley的 blog是 Sina的, 引用唔到,不過好多網友想知到食譜,希望佢唔介意我舖出黎喇(在此再三鳴謝)http://shirleyliving.mysinablog.com/index.php?op=ViewArticle&articleId=1413827
最難最難都係抿忌廉o既工序,又要唔厚,又要平滑,真係唔易,加上戚風模有小小斜邊,更添左難度。 今次唔算成功,不過我會加油,再接再勵,因為呢個蛋糕真係太美味啦。

2009年3月28日星期六

梅菜肉鬆蒸豆腐




百x豆腐係我唯一會食的豆腐,因為佢好滑,好似豆腐花咁,有唔會好似傳統豆腐咁太重豆味,係咪好矛盾,食豆腐竟然要食少豆味的!!  

講返呢個菜上面係梅菜炒肉鬆,預先整整好,其實就咁訴可以當一個餸, 但係我就喜歡將佢舖o係百x豆腐上,再一齊蒸10分鐘(當然要倒左d倒汗水先),再o係碟邊淋上加左糖調味的豉油,就係一個一濃一淡的最佳配搭啦。  我足足有成年無整過呢個餸啦,今晚呀爸呀媽過黎食飯,整呢個最o岩老人家,佢地好鐘意。 見佢地食得開心,我就充滿力量啦。

自家食譜:

材料 :甜梅菜一棵   /  $10半肥瘦豬肉(攪碎)

1)      梅菜洗淨,浸兩小時,搾乾水,切粒,用小許糖,生油撈勻,備用
2)      豬肉用糖,粉,生抽,油醃好備用
3)      豆腐離盒放再碟上約半小時(倒去流出的水份)
4)      梅菜先下獲,炒一會,下豬肉,炒至半熟
5)      下調味 (老抽,生抽和糖) 炒至豬肉熟透,試味,
6)      調到合適自己的口味就下小許生粉水,令材料黏在一起,有黏性,不散開
7)      將梅菜豬肉舖在豆腐上,大火蒸10分鐘,倒去部份倒汗水(只留小許),再淋上以糖調味的生抽便可上桌。

2009年3月22日星期日

美味簡易焗雞 (附食譜)






上星期黃太請我食飯,用焗爐整左隻五香粉燒雞,味香,又唔油。 不過我唔係好鐘意五香粉,所以o係佢啟發下,用鹽焗雞粉整左另一個版本。

反正琴晚得我同阿B 兩個食飯,簡單地整左個焗雞再加個炒雙蔬 (炒芥蘭+合掌瓜片)就一餐。

材料:

已溶雪冰鮮雞一隻 (選較小的)

醃料:四季鹽焗雞粉一包  +   鹽1/3茶匙 + 1茶匙五香粉  (混好)

-雞洗淨,抹乾,用醃料搽勻,醃最少2-3小時 (不要搽太厚,薄薄搽一層醃料便可)。
-焗爐較250度預熱15分鐘
-用一湯匙油抹勻雞身,入爐焗30分鐘

*如焗爐有旋轉燒雞配件,就更方便。

本來我個焗爐有配件可以整旋轉燒雞,但係當時無諗過會整,嫌阻地方就掉左,所以要將隻雞剪開先焗。