2008年7月31日星期四

無聊之習作(1) - 籃莓muffins



每當老公返中,無街去,就覺得超無聊喇,好彩而家愛上整餅,確實係消磨時間的最好活動呀。
29號係Apita 買左超甜藍莓整蛋糕比自己,乘返十幾粒藍莓,就用黎整muffins,唔好浪費嗎。我都係第一次用新鮮籃莓焗餅,原來會焗到爆汁架,試味時"mit"開個muffin裡面好多紫色汁,不過真係好美味阿。d籃莓淨係夠整4個2吋半既muffin,剩下來的,就整加浸軟o既提子乾整提子 muffin,可以整5個, 老公返黎有消夜食啦。呢d係第一輪焗,靚好多呀。

A 貨文華芝士蛋糕 - 已加食譜





各位網友:

**其實我呢個係a貨,真正係網上搵到既食譜係有甜忌廉同白朱古力成份,我怕太甜,無落到,就用酸忌廉代替。所以嚴格黎講,佢只可以話係貌似文華的New York Cheese Cake咋。 希望各位網友見諒。

食譜 (8)

a)  忌廉芝士 500g (室溫軟化) + 70g (可按自己口味加減)
b)  低粉 20g
c)    全蛋兩隻
d)   檸檬汁1湯匙(可按自己口味加減或刪除)
e)    酸忌廉 100g


1)        a放缸內打至軟滑再 + b 攪勻
2)        加入c打勻再加入d
3)        最後加入e,攪拌便成

-焗爐預熱160度,在焗盤注入熱水,以坐水焗方法焗約40-50分鐘
 **記緊要包好蛋糕模底部以防滲漏。
-焗至蛋糕表面熟(但不變色)就關火拿出,倒去焗盤中的水份,
-再把蛋糕放入已關火的焗爐,爐門開一點點,把蛋糕放在爐內約一小時
-取出完全待涼後按喜好舖上以加糖的酸忌廉,或好似我咁用籃莓醬裝飾。

2008年7月29日星期二

Happy Birthday to me.....文華芝士蛋糕





聽日係小女子生日,聽日會放假同老公去慶生。 今日親愛的同事們(共15人)請我食飯,我就叫佢地唔好買蛋糕,我會整生日蛋糕請佢地食當會禮。  今次整左文華芝士蛋糕,顏色比普通New York Cheese Cake靚好多,無焦啡色,同好似一件大牛油咁。 琴日o係公司樓下Apita 買了有機士多卑利同籃莓,兩樣都超甜,雖然比普通超市價錢貴,但係真係甜好多。  今朝一路裝飾,一路偷食。 今朝連洗生果整左成粒鐘,攪到遲到添。

o係呢道要同我親愛的同事們講聲:多謝你地呀呀呀呀呀!!

**打緊呢篇網誌時剛收到老公的花,好靚,好大札,好大朵,好心甜阿,多謝老公。

2008年7月20日星期日

涼拌茄子 (食譜)



今日Family gathering, 天氣大悶熱,想整d涼菜食o下,開胃有消暑。
向來我都鐘意食茄子,但係通常食到的都係魚香茄子,好油膩 ,用涼拌的方法整就唔同喇,一滴油都唔駛落。

靈感來自youtube一個台灣video, 但個醬汁就無跟佢,個師父用左醬油膏(唔知係乜,我諗係台灣食材)同成碗油,見到都驚,我諗下天用甜甜酸酸o既味道會開胃d,就用以下材料整了個醬汁。

-生抽  /  白醋 / 檸檬汁 / 糖  +  蒜蓉 / 芫茜 (係咁多,最緊要試o岩自己口味)
-茄子就切段,隔水蒸5分鐘 (鐘意"林"d可以蒸耐小小)
-攤涼
-淋上醬料雪30分鐘就食得啦。

2008年7月19日星期六

自家製 - 鹽燒雞皮 (附做法)





聽日有Family Gathering,  家姐要求我煮飯 (11人)。 我諗住整蜜汁焗雞鎚,因為佢地未食過,一共買左3磅雞鎚,我習慣將雞鎚上方最厚o個一塊雞皮切去,方便我反轉d肉將佢地扮雞脾時容易d。 

今日因為有成30隻雞鎚,切完之後共一小碗雞皮,諗下諗下,不如一於唔好晒,試下整鹽消雞皮啦。  亞b同老公去親食日本野,一定每人食兩串架。

做法-

-抹乾水份加小許油撈勻 (以防太乾,會易焦)
-用竹簽串起,每塊間留丁丁空間
-晒上適量黑椒粒喎撒上適量幼鹽
-放入已預熱250度的焗爐焗至香脆即成,我用了約20分鐘。
*焗時要在焗盤上放上網架,雞皮吋放上架上,才可焗至幹身香脆,油份會全滴到焗盤中。
*加鹽時要輕手一點,不要一次過落太多,如焗原後覺得淡可以再撒小許幼鹽,太  鹹就無得救喇。


食後感:
-口感和食味同係街食爐端燒幾乎一樣。 老公同亞b大讚,仲話唔夠食添。
-雖然好好味,但膽固醇同脂肪超高,不而常吃。

2008年7月15日星期二

一定唔會失手o既魚 - 滑滑豉汁蒸盲曹





先幾日去左黃金海岸玩,食o既野係 :

Day 1 - 酒店燒烤自助晚餐 (因為食完晏先check-in)
Day 2 - 早餐-麥記;午餐 - 深井裕記燒鵝,晚餐 - 老鼠洲海鮮 (當然餐餐都係叫到 一台都係野)
Day 3 - 早餐 - 茶餐廳早餐

睇見以上o既記錄,都知呢幾日食得有咁肥膩得咁肥膩啦。 返到屋企,諗起肉類同出街食飯都驚。  夜晚o個殘返屋企就去街市買左一條大盲曹要黎蒸(大到要剪短條d尾鰭先放到落鑊蒸),然後整坐一大碗上湯浸唐生菜(成斤半)就當一餐,因為呢幾日實再食得太多油啦,要清清腸胃。

做法好簡單:

1)蒜頭隨意,我鐘意多d,落左3粒,切小粒
2) 3茶匙豆豉,用水沖淨,倒去水份,加入蒜粒中用數隻筷子頭篤至變蓉狀
3) 加入小許糖,生抽及小許豆粉攪勻備用
4) 魚洗淨,舖薑片再碟底及魚肚,舖豆豉蓉在魚面,
5) 蒸十分鐘(我條魚好大條,時間按魚大小調節),
6) 淋以加糖調味的豉油,灑荵粒,淋小許熱油(可隨意,可免)


後記: 蒸盲曹係煮飯新手的最佳拍檔(當然仲有桂花魚同鯇魚腩喇),因為呢d魚肉本身好滑,好難會蒸得老,一定成公架。 

2008年7月14日星期一

慶祝派位成功@黃金海岸 - Part 2

星期五都好好天,我地都有去沙灘,另外兩家朋友,大小共8人加入,不過唔記得帶相機  夜晚一行16人楂車入老鼠州食開鮮,食到捧住個肚。
最後個日一早起身就落泳池,阿b同標標玩 keroro水戰旋轉球(淨係早上8-10有得玩,之前兩日早上有雷暴警告,泳池關閉,乜都無得玩),呢個遊戲係外國有,不過香港都係第一次見到,$50 /位好以玩10分鐘左右,好抵,睇住阿b同標標好似老鼠仔咁係個大波到扒o下扒o下,超好笑。


原來係個波裏面係好難企架,阿b最多都係可以咁,不過唔夠兩秒就跌底。






兩隻老鼠仔,哈哈........




天公真係對我地不薄,一路都無落雨,直到小朋友玩完旋轉球,才開始落雨,我地就上房執野check out,簡直係 perfect!!  Thank you God!!  

慶祝派位成功@黃金海岸 - Part 1

D朋友好有心,一早同我地 BOOK 定黃金海岸,佢地話成功就慶功,唔成功就當安慰喎。 因為幾家人都係紀律部隊人員,黃金海岸有優惠,住兩晚都係$9XX,唔駛$500一晚。
仲有阿b最鐘意既 Keroro軍曹水世界Promotion, 佢開心到飛起.


10號出發,我地楂車入去時仲係落緊大雨,好擔心要o係酒店呆坐三日添。真係多謝老天,一去到酒店就停雨,仲有小小陽光添,二話不說即刻換衫去沙灘玩,因為唔知第二日天氣點。阿b咁大個都係第一次o係沙灘游水咋,平時整係可以玩沙同係水邊浸下咋,佢不知同標標玩得幾興奮。   
夜晚仲係酒店食自助餐,恆生卡有6折,兩大一小,盛惠$580,都好多野食,勁抵 








2008年7月6日星期日

美味香蕉戚風

 





我真係愛上了戚風蛋糕,而家一得閒就會遊blog網羅所有戚風蛋糕的食譜。今日樓下生果店有梅花點香蕉賣,就決定整香焦戚風。

網上食譜有幾個版本,我最後都無跟,經過一輪比對,我都係用原味戚風再加香蕉蓉(加檸汁)黎整,因為有d食譜要用黃糖(我無),我自己又覺得用奶黎整蛋糕會香d (有d食譜又無加奶), 整好試味之後,覺得都好有焦味阿。

今晚阿姨同家姐同姨甥女黎食飯,就切比佢地試,佢地都話好鬆軟,同好蕉味,我自己都好滿意。

2008年7月1日星期二

無攪錯! 佢唔係戚風提子蛋糕,佢係包包


















今日係7。1,老公要當遊行更,阿b約左波友仔費高同康康黎玩,白無聊賴,就諗起不如整o下麵飽比佢地做下午茶。 本來諗住整墨西哥,之後又想整辮子飽,發酵,分割,再發酵之後,又想試o下整方飽,但係我個長方模太細,就忽發奇想用新買返黎o既7"慼風模整,物盡奇用丫,快d回本  整出黎造型好靚呀,個飽都唔細架,佢地一陣就食晒喇,仲猛話好味添。
其實我好enjoy整野比小朋友食,因為佢地要求唔高,整乜都話正架,每次都會話 "Auntie, 你整野好好味阿”,真係讚到我飄飄然,淨係呢句,搓到手軟都值喇。