2008年6月15日星期日

祝父親節快樂!!




琴日拔完甲啦,醫生初時麻醉藥落得唔夠,痛度我係咁流眼淚,最後加左兩次藥先可以順利完成手術。 做完喊都隻眼腫晒,老公心痛死。
今日去洗傷口,姑娘將我隻腳趾包到好大隻,老公猛話好得意,話返屋企同亞b係沙布上畫眼耳口鼻,以為佢地大隻講,點知佢地黎真。 兩人夾手夾腳畫左呢個公仔,不過都可得意啊。 老公話呢個係佢黎喎,不過亞b話如果係就慘啦,個公仔成日苦瓜乾咁!!
老公,真係唔好意思啦,呢個父親節我變左"癱姬",乜都要你服侍。仲煮唔到好野比你食,仲累你呢幾近於日日日食飯盒,不過我應承你,好翻一定會同你補祝翻架。

2008年6月8日星期日

Yes!! 亞B 派到第一位!!


擔心左咁耐,今朝亞B終於放榜啦。 琴晚10點已經食定半粒安眠藥,但係今朝5點半醒左,一諗起就訓唔返。  其實我心知佢多數會成功,但都擔憂有意外。

派結果時,阿B同我地分開房,分格一個走廊,老師派結果比佢,家長就聽老師講解如果派得唔好要點做。 但當時真係緊張到一句都聽唔入耳,15分鐘後,小朋友終於黎同我匯地合,知到佢派到第一位中華基金,D眼淚即刻標晒出黎。  

除左多謝慈幼學校教職員(尤其係Ms. Kong & Mr. Chiu)多年來對阿B照顧之外,仲要多謝阿B, 由你出世到而家,你令我每一刻都充滿喜樂同驚喜,雖然有時你會唔聽話,但係每到緊張關頭,你從未令我失忘過!! I lOVE YOU!!  
 
派完位忽然大雷大雨,亞B又有精句:
阿B: 媽咪,雷公發嬲呀
我: 點解呢?
阿B: 佢個仔派唔到好學校囉!
我同老公同時話: 低B!!

阿B係咁架啦,12歲啦,仲係好似BB咁!! 唔知幾時先成熟D呢~

2008年6月5日星期四

Owenmama牛油曲奇 (食譜)







奇怪地之前有網友話跟足我份量整好多次都整唔到呢個效果,我今次特登量得好小心,好準確,有埋圖片,希望各位有興趣的朋友可以成功整到啦。


應承了網友 sandyy 得閒教佢點整車厘哥夫曲奇,今日阿b留係屋企溫書,我終於還到債啦。 我唔識upload video, 只好用圖解啦。 sandyy, 我諗你係新手,所以今次特別詳細,希望幫到你啦。 (呢個份量整到22個曲奇,要整幾多,你就自己跟比例加減啦。)

呢個曲奇係改自網友食譜,配合了左自己的口味,我就叫佢做奧雲媽媽牛油曲奇啦。


材料
牛油 100g  /  糖霜  70g  /  Vanila 香油  數滴 /  鹽  小 許   
高粉  40g   /  低粉   60g /  粟粉  10g  /  蛋汁 10g

 1) 牛油切片於室溫攤軟      至用軟刀輕力可抹開牛油
2)  用機打牛油一會, 加入糖霜打至淡色,再加入Vanila 香油
 3) 加蛋汁打勻,加入已篩的粉類,用膠摑拌勻

入袋唧花, 放入已預熱180度的焗爐焗約10-15分鐘左右 (要耐唔耐睇o下火呀,因曲奇大小不同,焗的時間也不同。),花與花之間預留一點位,因焗的時後曲奇會發大一點(花紋因牛油容化而變淺)。


上次用的唧咀唔見左,今次用左個細小小的,我覺得上次d紋密d靚d,等我快d買翻個先。
阿b同daddy一陣間就食左10塊,都係快d收埋,唔係肥死佢地。




牛油切片於室溫攤軟      至用軟刀輕力可抹開牛油

用機打牛油一會
加入糖霜打至淡色         
 
 
加入Vanila 香油
                                                      

 













2008年6月1日星期日

再戰戚風 - 芝麻味




自從前幾日整完首個戚風蛋糕,簡直愛上了,琴晚黃太返珠海探媽媽,黃生同康康黎食晚飯,康康話黃太要琴日下午先返,黃生聽朝要開工,康康話聽朝會自己煮早餐,既然佢留底同阿B打機(黃生半夜3點要開工,要早走訓覺),我又手痕,就叫佢留夜d,我整蛋糕比佢聽日做早餐,反正阿B都好以食。

屋企除左朱古力,淨係得芝麻粉,我想試下新口味,就決定整芝麻,初初老公同阿b都話未食過芝麻蛋糕,話怪喎,不過我唔理,一於迫佢地試,我取用一個無發粉o既食譜 (natural D) from 小刁愛煮 (不過我用的是無糖芝麻粉,所以要加糖的份量), 因為仲未買戚風模,就用7吋甩底模整,靚表姨教我唔駛掃油落模,亦唔駛譜紙,就試o下。

倒漿時都好驚會漏,好彩真係無漏。 但係個面就焗都爆開左,倒扣後尖刀幫助脫模,然後批去面層,就變成上面咁靚啦。

今次真係好成功,準時10:30pm 康康就可以拎半個蛋糕返屋企,我即時設左小小比老公同阿B食,嘩,完來芝麻戚風係咁好食架!!

**多謝靚表姨指教!!